Një grua gjermane është shndërruar në lajm të ditës në mbarë botën pasi ka njoftuar se është shtatzënë. Në fakt nuk bëhet fjalë për ndonjë pinjolle të ndonjë familjeje mbretërore, sepse ajo nuk është VIP. Annegret Raunigk është thjesht një 65-vjeçare. Pas një viti e gjysëm tentativash për të mbetur shtatzënë, përmes metodës së mbjelljes artificiale, më në fund Raunigk që është aktualisht mamaja e një vajze 13-vjeçare, është në pritje të katërnjakëve. Sipas televizionit gjerman RTL, 65 vjeçarja vendosi që të provojë të sjellë në jetë një fëmijë tjetër pasi e bija i kërkoi një motër, apo vëlla.
Në një intervistë televizive, nëna e ardhshme ka mbrojtur vendimin e saj për t’i hyrë kësaj sipërmarrjeje të vështirë dhe sipas saj, secili prej nesh duhet të jetojë jetën që ka dëshirë dhe duke qenë se ekziston një mundësi e tillë dhe se kjo shfrytzohet nga shumë njerëz, ajo vendosi ta bëjë ëndrrën realitet. “Unë nuk kam frikë. Shpresoj se do të jem e shëndetëshme dhe në formë. Sa për çështjet e organizmit, mund të them se kam mjaft pëvojë sepse nuk është një gjë e re për mua pasja e fëmijëve”, ka thënë 65 vjeçarja.
Ndërkaq, opinioni publik ka qenë shumë gjykues dhe negativ ndaj saj. Për shumëkënd, ajo është një person i papërgjegjshëm. Madje të këtij mendimi kanë qenë edhe disa gazetarë dhe politikanë në Gjermani. Njëri prej tyre e quajti këtë çështje “shumë të dyshimtë”, sepse mbi të gjitha kjo shtatëzani mund të shndërrohet në shembull edhe për raste të tjera. “Ne nuk mund të bëjmë gjithçka, vetëm pse nga ana mjekësore kjo mund të jetë e mundur”, ka deklaruar një gazetar. Sipas ekspertëve, bëhet fjalë për një shtatëzani shumë të vështirë për shkak të moshës së nënës dhe katër fetuseve që ajo mban.
Rasti tjetër i kësaj natyre kur një nënë ka pasur një moshë të madhe është ai i Maria del Carmen Bousada de Lara, e cila në moshën 66-vjeçare soli në jetë dy djem në vitin 2006. Por Lara vdiq nga kanceri kur ata ishin vetëm 2 vjeç.
