Gjykata e Tiranës ka caktuar ditën e sotme masën e arrestit me burg për ish ministrin demokrat të Punës dhe Çështjeve Sociale, Spiro Ksera. Nga ana tjetër, gjykata dha po të njëjtën masë sigurie për bashkëpunëtorin e tij Artevis Menen, ndërsa për Pranvera Lilën u përcaktuar “detyrim paraqitjeje”.
Avokati mbrojtës i ish ministrit Ksera, Gjokutaj, duke e cilësuar si të padrejtë masën e arrestit të dhënë ndaj klientit të tij, ka deklaruar se ky vendim do të apelohet në ditët e ardhshme.
Ish-ministri i Punës dhe Çështjeve Sociale, Spiro Ksera dhe disa prej ish-vartësve të tij të arrestuar u paraqitën sot në orën 13:00 në Gjykatën e Tiranës për t’u njohur me akuzat që Prokuroria ka ngritur ndaj tyre.
Sipas prokurorisë ka dyshime serioze se ish-ministri ka kryer veprën penale të “vjedhjes duke shpërdoruar detyrën” nëpërmjet procedurave fiktive për organizimin e disa aktiviteteve social-kulturore gjatë vitit 2013.
Vjedhja nga buxhetit i shtetit, sipas organit të akuzës, është në shumën e 30 milionë lekëve. /tesheshi.com/
