Pas deklaratës së Ministrit të Punëve të Brendshme, Oliver Spasovskit se është abuzuar me letërnjoftimet dhe me identitetin e qytetarëve, reagoi edhe Kryetari i Komunës Qendër, Andrej Zhernovski. Ai kërkoi përgjegjësi nga ana e kryeministrit Nikolla Gruevski si dhe nga ishministrja e Punëve të Brendshme, Gordana Jankullovska.
“Dua t’i ftoj institucionet e vendit që kësaj pune t’i shkojnë deri në fund, sepse kjo duhet të përfundojë me padi penale për atë ministre, e cila deri dje thoshte që punon sipas Kushtetutës dhe ligjeve, si për punëdhënësin e saj, i cili na thoshte se e ka përkrahjen e qytetarëve të Republikës së Maqedonisë”, tha Andrej Zhernovski, kryetar i Qendrës.
Zhernovski mes tjerash theksoi se Prokuroja Speciale Katica Janeva e ka në dorë hetimin e rastit, kur nga bisedat e përgjuara, vërehet se si Jankullovksa kërcënon me sulm fizik kryetarin e Komunës Qendër, Zhernovskin.
“Ditëve të fundit mora informatë dhe dokument zyrtar nga Prokuroja Speciale Katica Janeva. Pikërisht, kjo prokurori është shpallur kompetente për rastin e padisë penale tonën për sulmet fizike të cilat Gruevski i ka planifikuar kundër meje dhe kundër Komunës Qendër”, shtoi Zhernovski.
Me anë të një komunikate reagoi partia në pushtet VMRO-DPMNEja. Sipas tyre, kjo konferencë për shtyp e Zhernovskit është manipulim dhe se LSDMja nuk mund t’i ikë këtij skandali. Në këtë komunikatë po ashtu thuhet se janë të kota pretendimet se 22 letërnjoftimet janë joligjore, dhe se ata kanë pasqyruar dëshirën e 200 mijë votuesve, sa dhe është dallimi mes VMRODPMNEsë dhe LSDMsë.
Dje ministri i Punëve të Brendshme Oliver Spasoski tha se rreth 22 qytetarë nga Pusteci në mënyrë të paligjshme janë pajisur me letërnjoftime. Ai mes tjerash, tha se pa vërtetim vendbanimi, asnjë qytetar nuk mund të pajiset me letërnjoftim dhe se ky dokument paraqet bazë për nisjen e procedurës të marrjes së letërnjoftimit./tesheshi.com/
