Në buxhetin e ri të Bashkisë së Tiranës është parashikuar ulja e taksës së pasurisë me 30% për 10 njësi administrative. Kryetari i Bashkisë, Erion Veliaj, gjatë prezantimit të paketës fiskale për vitin 2016 bëri të ditur përpara Këshillit Ekonomik të Tiranës se ajo që propozohet është një ulje të disa taksave si ajo e pasurisë, e fjetjes apo e tabelës.
Kryetari i Bashkisë së Tiranës tha se lajmi i mirë është shfuqizimi i taksës për biznesin e vogël. “Kjo taksë e cila për shumë vite me radhë ka qenë barra kryesore e biznesit të vogël, është shfuqizuar, dhe ky është me të vërtetë një lajm i shkëlqyer. Kështu, biznesi me qarkullim vjetor nga 0 deri në 5 milionë lekë do të paguajë zero taksa”, u shpreh Veliaj.
Një tjetër lajm i mirë për të gjitha bizneset e hoteleri – turizmit është ulja e taksës së fjetjes. Në Tiranë ka pasur një taksë që ishte 5% e çmimit të dhomës, në varësi të tarifës.
Nga ana tjetër, Bashkia e Tiranës ka planifikuar uljen e taksës së tabelës duke e zeruar atë për sipërfaqe deri në 2 metra katrorë, por duke mos hequr atë të taksës së reklamave./tesheshi.com/
