Nga Blendi GASHI
Presidentja Atifete Jahjaga, në fjalimin vjetor të mbajtur të enjten para deputetëve të Kuvendit, bëri të ditur se ky është adresimi i saj i fundit para ligjvënësve në prag të përmbylljes së mandatit si presidente e Republikës së Kosovës.
Për këtë pjesë të fjalimit Jahjaga mori duartrokitjet e kabinetit qeveritar, por edhe të gjithë deputetëve të pranishëm në sallë, të cilët në shenjë respekti u ngritën në këmbë, çka e mallëngjeu jo pak presidenten. Jahjaga tha se nuk ka pasur nder më të madh për të se sa të jetë presidente e Republikës Kosovës për gjatë pesë viteve.
“Ua them me kuptimin e plotë të fjalës se nuk ka pasur privilegj më të madh se të qëndroj në ballë të një shoqërie që, nën represion, spastrim etnik dhe kërcënim të vet ekzistencës, asnjëherë nuk u zmbraps nga ëndrra e të bërit shtet. Që vazhdon të mbështetet fuqishëm në vlerat më të avancuara të njerëzimit. Që me krenari e lartëson partneritetin dhe miqësinë e thellë me Shtetet e Bashkuara të Amerikës. Që synon pa u dekurajuar integrimin në Bashkimin Evropian”, theksoi Jahjaga.
Që nga emërimi i saj në këtë post Jahjaga është ballafaquar me shumë situata të pakëndshme dhe ka marrë vërejtje jo të pakta nga vet politika, shoqëria civile e mediat, për mënyrën se si është zgjedhur në këtë pozitë, por edhe mënyrën e udhëheqjes së vendit.
Jahjaga më shumë vlerësohet se ka bërë punë të mirë në arenën ndërkombëtare pasi ka marrë pjesë në shumë takime të rëndësishme. Po ashtu, dallohet nga politikanët e tjerë kosovarë pasi është një lidere ndaj së cilës nuk është drejtuar gishti për afera korruptive.
Portali mbarëkombëtarë tesheshi.com ka marrë mendimin e analistëve politikëse si e shohin ata udhëheqjen pesë vjeçare të presidentes. Ata kanë folur për vendimet që ka marrë ajo dhe mënyrën se si ka prezantuar vendin.
Analisti politik, Nexhmedin Spahiu, ka deklaruar për tesheshi.com se Jahjaga nuk ka ditur të shfrytëzoi shansin që i është dhënë, duke e mos e vlerësuar si një presidente të denjë për shtetin.
“Presidentja Jahjaga ka qenë presidentja më e dobët që kemi pasur. Asaj ju dhanë shanse të shkëlqyera, por nuk e pati aftësinë që këto shanse t’i shfrytëzojë për të mirën e Kosovës”, ka deklaruar Spahiu.
Analisti tjetër, Blerim Burjani, ka pohuar për tesheshi.com se presidentja Jahjaga do të mbahet mend si presidente me post të falur dhe të mbrojtur me kërkesë të saj në Gjykatën Kushtetuese duke thyer marrëveshjen me partitë që i kishin falur këtë post.
“Do të mbahet mend si presidente e zarfit, si presidente me probleme me të lexuar dhe me të shprehur opinionet e saj, presidente që nuk e dëgjuan asnjëherë partitë politike. Ajo as brenda Parlamentit të vendit nuk gëzoi besim. Kjo presidente ishte më shumë formale dhe formalisht u përkrah edhe nga bashkësia ndërkombëtare. Presidentja nuk kishte kurrfarë suksesi. Edhe pse themeloi Këshillin antikorrupsion nuk bëri asgjë, pasi nuk kishte kurrfarë ndikimi në reduktimin e korrupsionit në vend”, ka deklaruar Burjani.
Njohësi i rrethanave politike në vend, Faik Krasniqi, në një prononcim dhënë për tesheshi.com ka deklaruar se Jahjaga do të mbahet mend për ardhjen e saj nga zarfi në krye të shtetit, ndërrimin e gardërobës disa herë brenda ditës dhe për gafat e shumta që ka bërë në fjalimet e saj.
“Do të mbahet në mend që edhe me dashje ose pa dashje, bëhej ‘zëdhënëse’ dhe avokate e këtij pushteti kriminal dhe mafio-politikës, siç ndodhi me rastin në TV gjerman ‘ZDF’, ku e poshtëroi vetveten duke mos i dhënë përgjigje në pyetjen e moderatores gjermane. Në bazë të kompetencave të saja që ka pasur si presidente, ka mundur të ndikojë shumë në skenën politike të Kosovës, por ajo gjithmonë ishte në anën e mafio-politikës dhe avokate e tyre. Prandaj, nuk mund të vlerësojmë asgjë që ka bërë në këto 5 vite, sepse ka shërbyer më shumë si ‘kukull’ në atë post”, ka deklaruar Krasniqi./tesheshi.com/
