Ndarja e 53 milionë eurove nga qeveria e Kosovës për kompaninë “Bechtel Enka” për autostradën “Arbër Xhaferi” si penalti ka përplasur kryeministrin Ramush Haradinaj me LDK-në e Isa Mustafës palë të cilat fajësojnë njëra-tjetrën për dëmtim të buxhetit të shtetit.
Ish-ministri i Infrastrukturës, tani deputet i LDK-së, Lutfi Zharku ka hequr përgjegjësinë nga vetja dhe ish-qeveria “Mustafa”, duke bërë përgjegjës pasardhësin e tij Pal Lekaj nga AAK për ndarjen e mjeteve.
“Përftimi nga kostoja prej 53 milionë eurove është në kundërshtim me ligjet e Kosovës dhe kjo kërkesë konsiderohet e pabazë. Duke e ditur si kërkesë të pabazë kompania ka nënshkruar marrëveshje vetëm me Pal Lekaj, duke anashkaluar menaxherin e kontratës”, tha Zharku në interpelancën e kërkuar nga partia e tij me kryeministrin për këtë çështje.
Sipas tij, Lekaj ka pranuar se ka shkelur rregullat e kontratës edhe më një shkresë zyrtare dërguar anëtarëve të komisionit për zhvillimi ekonomik të Kuvendit, prandaj kërkoi nga Haradinaj shkarkimin e ministrit Lekaj dhe anulimin e kontratës për ndarjen e 53 milionë eurove për “Bechtel Enkan”.
Por si Zharku njëjtë veproi edhe Haradinaj duke hequr nga përgjegjësia e tij ndarjen e 53 milionëshit dhe duke bërë përgjegjëse LDK-në.
Ai ka thënë se marrëveshjen e ka gjetur në tavolinë dhe në mes të asaj se a të mbyllet marrëveshja e të lihen punët në gjysmë, apo të vazhdohet, ka vendosur për këtë të dytën.
“LDK-ja është fajtore meqë ata kanë marrë para nga borxhi për të nisur projekte nëpër komunat që i kanë udhëhequr kryetarët e kësaj partie. Nuk po i kuptoj sot çka kanë, pse s`e ka nënshkru zotëria (ish-ministri Zharku) 14.7 milionëshin po ma ka lënë në tavolinë. Duke qenë kështu, kemi materiale që tregojnë cka ka ndodhë”, tha Haradinaj me ç’rast shtoi se qeveria e tij nuk ka guxuar ta çojë marrëveshjen në Arbitrazh, meqë sipas tij, kjo do të ishte çështje e humbur.
Pas akuzave të kryeministrit ndaj partisë së Isa Mustafës, në debat u përfshi edhe deputeti i LDK-së Kujtim Shala i cili akuzoi kryeministrin se bëri edhe më të paqartë dhënien e 53 milionëshit, ndërsa shtoi se qeveria “Haradinaj” nuk ka publikuar asnjë lloj dokumenti relevant në lidhje me koston e paguar ndaj Bechtelit.
Shala arsyetoi se qeveria Mustafa nuk i ka paguar 14.7 milionë euro pasi që do të ishte vendim i paragjykuar, ndërsa vendimin e qeverisë Haradinaj e ka quajtur arbitrar dhe të pabazuar ligjërisht.
Pas kësaj deklarate reagoi Haradinaj i cili akuzoi LDK për mosmbyllje të borxhit 14 milionshësh derisa tregoi se kush e bën korrupsionin.
“Ju po thoni që Bechtel-i është më pak korruptive se kjo qeveri. Korrupsionin vetë e kemi bërë, nuk ka ardhë as Bechtel-i, as kurrkush me e bë. Unë jam duke i pastruar ato që ju i keni lënë. Ju siguroj që deri në shtator s’kanë me mbetë tema të vjetra përveç gjyqësorit”, tha ai.
Për temën në fjalë folën edhe deputet të Vetëvendosjes të cilët kërkuan përgjegjësi dhe analizë e hollësishme për 53 milionë eurot e dhëna, por edhe deputet të partive tjera.
Përgatiti: Blendi Gashi – tesheshi.com
