Një ditë më parë, ndaj Osasunës, Sergio Ramos luajti ndeshjen e tij të 500-të me bluzën e Realit të Madridit. Një histori e jashtëzakonshme për një mbrojtës që ka shënuar 66 herë për ekipin madrilen, ku nuk duhen harruar golat në finalet e Champions League-s në 2014-n dhe në 2016-n.
“Në shtator të 2005-s, 19-vjeçari Sergio Ramos la Seviljen për t’u bërë blerja e parë spanjolle e Florentino Perez-it si presidenti i Realit të Madridit… ndërsa ai është bërë një nga lojtarët më emblematikë për Los Blancos,” shkruan Marca.
“Cilësia, karakteri dhe karizma kanë ndihmuar për ta bërë atë një legjendë,” lexohet në faqen elektronike të Realit të Madridit.
Në të njëjtën faqe radhiten arritjet e tij që kur veshi bluzën e klubit të famshëm spanjoll.
“Sergio ka luajtur në 350 ndeshje të La Liga-s, në 96 ndeshje të Champions League-s, në 39 ndeshje kupe, ka bërë 10 paraqitje në Superkupën e Spanjës, 3 në Botërorin e Klubeve dhe 2 në Superkupën e UEFA-s. Ai ka fituar çdo titull të mundshëm me Realin e Madridit: dy Champions League, dy Kupa të Botës për Klube, dy Superkupa të UEFA-s, tre tituj të La Liga-s, dy Kupa të Mbretit dhe dy Superkupa të Spanjës.”
“500 ndeshje me Realin e Madridit është më shumë se një ëndërr e bërë realitet. Faleminderit çdokujt!”
Eshtë ky reagimi i vetë Ramos-it pas arritjes së tij. Gjithçka tjetër flet vetë. /tesheshi.com/
