Nga Mensur Krasniqi
12 prilli 2012-ës në Maqedoni gjithmonë do të kujtohet për vrasjen makabër të pesë të rinjve maqedonas në Liqenin e Smillkovës së Shkupit nga persona të panjohur, për të cilën sot e kësaj dite po vuajnë burgun e përjetshëm 5 shqiptarë.
Por kjo ditë, përveç familjarëve të të rinjve kujtohet edhe nga familjarët e të burgosurve shqiptarë. Njëri nga to është Bedri Ajdari, drejtues i këshillit të familjeve për rastin “Monstra”, i cili ka shprehur ngushëllime për familjarët e të rinjve maqedonas; por siç thotë ai për tesheshi.com, këto ngushëllime parimisht kanë qenë të papranueshme për ata, derisa dita ditës po binden se gjithçka ka qenë e montuar politikisht.
“Sot është dita e kobshme për familjet e të vrarëve tek liqeni i Smillkovës, për të cilën vepër u akuzuan familjarët tanë dhe të tjerë bashkëkombas. Këtu filloi gjithçka: pushteti mafioz kundër vetvetes i cili i tejkaloi gjitha limitet e lejueshme të një pushteti pasi që koha nxorri në dritë se kush është pas këtij skenari dhe kush po i vuan pasojat e tij. Ne si familje, pasi na ka tanguar më së shumti ky rast, si shqiptarë u kemi shprehur ngushëllime familjeve tw viktimave maqedonase, por asnjëherë nuk e kemi ulur kokën para tyre pasi nuk jemi ne fajtorët për këtë gjë; ndërkohë që ato si familje që kishin humbur të afërmit e tyre u sollën keq me neve sepse ishin të nxitur nga pushteti. Sot, edhe pse vonë e kanë kuptuar në njëfarë mënyre se kush qëndron pas këtij rasti, ato si familje nuk dalin me një qëndrim të pastërt për zbardhjen e këtij rasti. Por sidoqoftë, përgjimet dhe bombat që po dalin ditë pas dite nuk po i pyesin familjet tona se “a mund po fleni të qetë”, po qytetarët maqedonas po pyesin “a po të merr gjumi o kryeparlamentar?”
Bedri Ajdari, ndërmjet tjerash ka edhe një mesazh për përfaqësuesit politikë shqiptarë.
“Mesazhi i familjeve tona për përfaqësuesit politik të shqiptarëve është: çfarë ndërrmorën qe 5 vite pasi edhe ata e kuptuan lojën e flliqtw me vrasje dhe burgosje të njerëzve të pafajshëm me pasoja e vuajtje të rënda, apo kur e kanë ndërmend të ndërmarrin ndonjë gjë konkrete dhe serioze për rastin ‘Monstra’ dhe për të gjitha rastet tjera?”, shtoi Ajdari.
Aktivisti qytetar, Bekim Berisha duke e kujtuar këtë ditë, rastin “Monstra” e krahasoi me rastin “Panda” të vitit 1998 ku ishin vrarë disa të rinj serbw dhe ishin akuzuar shqiptarët. Mirëpo që për fat të mirë, presidenti aktual i Serbisë, Aleksandar Vuçiç ka zbuluar se rasti në fjalë është montim dhe turp i shërbimeve sekrete serbe.
“Sot përmbushen pesë vite nga vrasja e pesëfishtë te Liqeni i Smilkovës. Kjo ditë përveq se për familjarët e të vrarëve, pa dyshim është e vështirë edhe për gjithë shtetin, sepse si asnjëherë më parë në Maqedoni u vranë pesë të rinj pa pikën e fajit! Edhe më e vështirë kjo ditë është për ne shqiptarët e Maqedonisë. Kjo sepse si shumë herë më parë në regjime të ndryshme, edhe kësaj rradhe shqiptarëve po u përgatitej një akuzë e rëndë, edhe atë e gjithë kjo e pshtjellur me aspektin fetarë. U dit menjëherë se kush do akuzohej, nga reagimet e orkestruara të horrave fashist që ishin në qeveri, e që i kishin nxjerrë disa njerëz të protestonin kundër shqiptarëve! Shqiptarët do të akuzoheshin edhe një herë, se gjoja paskan vrarë fëmijë në emër të fesë. Pas kësaj akuze u shkel mbi dinjitetin tonë nga ana e policisë duke na hyrë nëpër shtëpitë tona dhe duke na tërhequr zvarrë, gjoja se u zbuluan fajtorët! Nuk duhet harruar se BDI ishte në qeveri dhe nuk lëvizi as me gishtin më të vogël për ta parandaluar këtë maskarallik! Shqiptarët e ndjenin se edhe një rast po u montohet, por nuk kishim se si ta dëshmonim! Krejt në fund, një gjykatëse do ta lexonte dënimin me burgim të përjetshëm për disa shqiptarë, vetëm e vetëm pse ata kishin dëgjuar këngë specifike në youtube! Ky rast me doemos se do zbulohet, njejtë sikur që u zbulua edhe rasti “Panda” i cili kishte ndodhur në vitin 1998 në Pejë, ku ishin vrarë disa të rinj sërb dhe ishin akuzuar shqiptarët! Rasti “Panda” u zbulua, dhe nga vetë Presidenti Vuçiç u tha se ai rast është montim dhe turp i shërbimeve sekrete sërbe! Pa dyshim se edhe rasti “Monstra” do zbulohet, dhe pa dyshim se fajtorët e vërtetë do ta marin dënimin e merituar, por ajo që ngelet me shije të hidhur është pyetja: deri kur ndaj shqiptarëve do të montohen raste të tilla?! Të mos përsëritet KURRË!!!”, ka shkruar në rrjetin social facebook Bekim Berisha.
Kujtojmë se lideri i LSDM-së, Zoran Zaev gjatë publikimit të ashtuquajturave “bomba”, ku dëgjohen përgjimet e bisedave telefonike të funksionarëve të lartë politik, ka thënë se në mesin e tyre gjindet edhe një transkriptë bisedash për rastin “Monstra”.
Po ashtu, edhe para disa ditësh, njëri nga avokatët e familjarëve të të rinjve maqedonas, Trajko Pançevski deklaroi se ekziston bisedë telefonike ku kryeparlamentari i Maqedonisë, Trajko Veljanovski mundohet që ti fsheh dhe asgjësojë dëshmitë për zbardhjen e këtij rasti.
“Nuk e keni idenë se si bëjnë pazarllëqe nën tavolinë me rastin “Monstra”. Përveç Trajko Veljanovskit i cili dëgjohet në telefonatë duke tentuar që të fsheh gjurmët e zbardhjes së rastit në fjalë, ka edhe 5 funksionarë tjerë që janë të implikuar në këtë rast. Unë tani kam marrë leje që ta ndaj këtë informatë edhe me opinionin e gjërë, që ta dijnë të vërtetën. Telefonata e përgjuar shkon nga dora në dorë, dhe sillen shumë para veç të asgjësohet si dëshmi”, ka thënë avokati i viktimave nga rasti “Monstra”, Trajko Pançevski. /tesheshi.com/
