Nga Miradie Hasani
Një pjesë e politikës maqedonase ka përkujtuar 5-vjetorin e asaj që në historinë e këtij vendi njihet, prej kaq vitesh sigurisht si “E hëna e zezë”. Pra, ajo që ndodhi më 27 prill të këtij viti, si kulm që përgjakja e Zoran Zaevit, ka ndodhur që në 24 dhjetor të 2012-ës.
Shkak ishte miratimi i buxhetit. Atë kohë, regjimi i Gruevskit, sot i shkërmoqur, ishte në kulmin e tij. Opozita e kohës kundërshtonte buxhetin me pretendimin e shpenzimeve të mëdha për projektin “Shkupi 2014”. Dhe mu për këtë shkak nisi përleshja mes deputetëve, ku sigurimi i Kuvendit nxorri me dhunë në rrugë deputetët e LSDM-së dhe gazetarët.
Ndaj, kjo parti që sot është në pushtet, 24 dhjetorin e rendit te ditët më të zeza për demokracinë e Maqedonisë dhe shton se politikat e tilla shumëvjeçare që kultivuan frikë dhe kërcënim nga ana e regjimit të Gruevskit dhe VMRO-së, kulmuan me sulmin e 27 prillit të këtij viti.
“Nikolla Gruevski dhe familja e tij politike, para syve të gjithë opinionit, nëpërmjet keqpërdorimeve të policisë në shtëpinë e ligjit e shkelën demokracinë në mënyrë brutale duke nxjerrë dhe rrahur gazetarë e deputetë”.
Në lidhje me këtë rast, në fillim të dhjetorit të 2017-s, ministri i Punëve të Brendshme që vjen nga rradhët e atëherë partisë opozitare, tash në qeveri, Oliver Spasovski, njoftoi se gjatë të “hënës së zezë” policët që i nxorën deputetët dhe gazetarët nga Kuvendi janë shpërblyer nga ish-pararendësja e tij, Gordana Jankulloska.
“Na ndodhi 24 dhjetori. Nuk është reaguar ashtu siç duhet dhe nuk mundej të pastrohet, pasi që u ishte dhënë urdhër zyrtarëve policorë që të vijnë dhe t’i nxjerrin me dhunë gazetarët dhe deputetët. Dhe jo që i kanë nxjerrë jashtë, ja publikisht e them, ish-ministrja e atëhershme e Punëve të Brendshme i ka shpërblyer të gjithë ata zyrtarë policorë me nga 12.000 denarë shtesë në pagë”, tha Spasovski.
Nga ana tjetër, Katerina Canevska, atëherë si gazetare nuk e haron se si fizikisht e ka goditur njëri nga personat që kishte hyrë brenda dhe ishte prezantuar se është i sigurimit.
“I thashë atëherë zotërisë që prezantohej se është i sigurimit se nuk guxon as të më godasë e as të më prekë dhe ai më tha se do të vijë koha kur do ta shohësh se si do të godas. Kur i thash se a e di se kjo ndoshta edhe është incizuar, ashtu siç ishte më shtyu dhe më gjuajti nga galeria, e për gjithë këtë ka edhe incizime. Pas 5 vjetëve mund të them se lëndimet trupore më kaluan, dhimbja më kaloi, mirëpo zemërimi me atë çfarë ndodhi, edhe me gazetarët edhe me deputetët, por edhe me Maqedoninë nuk mund të më kalojnë, pasi që atëherë dikush dëshironte ta vrasë demokracinë në RM”, tha Canevska.
Më 24 dhjetor, teksa ndodhnin incidentet në Kuvend, jashtë mbaheshin protesta të udhëhequra nga lideri atëhershëm i LSDM, Branko Crvenkovski dhe kundër-protestë e organizuar nga partia në pushtet, VMRO.
Ngjarjet rezultuan me bojkot të Kuvendit dhe me protesta javore në rrugë. Në periudhën e ardhshme kriza u thellua, opozita drejtësinë e kërkonte përmes demokracisë në rrugë, ndërsa ishte në pikëpyetje edhe pjesëmarrja e saj në zgjedhjet e ardhshme lokale. E gjithë kjo rezultoi me krizë politike e cila përfundoi me pjesëmarrje të gjithë partive politike në zgjedhjet lokale, ndërsa më pas u formua Komisioni Anketues, anëtarët e të cilit konfirmuan se në atë ditë është shkelur Kushtetuta e Maqedonisë. /tesheshi.com/
