Kur shkojmë të bëjmë një kontroll rutinë tek mjeku, gjëja e fundit që presim që të dëgjojmë nga goja e tij, është se jemi prekur nga kanceri. Gjatë viteve të fundit është vënë re se përqindja e personave të prekur nga kanceri është rritur dukshëm. Kjo është një ndër arsyet kryesore se pse çdokush duhet të jetë i vëmendshëm dhe të marrë masa parandaluese për shëndetin e tyre.
Ka një trend rritës të kancerit në organet e riprodhimit dhe ato mund të na çojnë në probleme të tjera hormonale apo të pjellorisë. Gjithmonë duhet të jeni të vëmendshëm për simptomat që mund të shfaqen nga kanceri, kur ai është në fazat e para. Në veçanti meshkujt duhet të njohin simptomat e kancerit në testikuj si dhe hapat që duhen marrë për ta parandaluar.
Shanset e kancerit në testikuj
Megjithëse mund të mos jetë e zakontë si llojet e tjera të kacereve, numri i personave të prekur nga kanceri në testikuj është rritur gjatë viteve të fundit. Të dhëna empirike tregojnë se ka shanse më të mëdha që meshkujt mes moshës 35 dhe 45 vjeçare të preken nga ky lloj kanceri. Nëse vini re simptoma në moshë më të re, duhet ti drejtoheni patjetër mjekut.
Cilët janë faktorët më kryesorë?
Kanceri në testikuj shfaqet tek të gjitha moshat, por ka disa faktorë që mund të rrisin shanset për tu prekur nga ky lloj kanceri. Duhet ti konsideroni disa nga këta faktorë dhe të ekzaminoheni sa më herët të jetë e mundur.
Mosha juaj – Nëse jeni një mashkull në moshën mesatare, atëherë shanset që ju të prekeni nga kanceri në testikuj janë shumë më të mëdha se çdo mashkull në çdo moshë tjetër.
Trashëgimia – Nëse keni pasur një person që ka qenë i prekur nga kanceri në testikuj në familjen tuaj, atëherë shanset që të prekeni edhe ju janë shumë të larta.
Zhvillim jo normal i testikujve – Tek meshkujt që nuk kanë një zhvillim normal të testikujve, ka shumë mundësi që të krijohet kanceri në testikuj.
Duhanpirja – Nëse ju konsumoni duhanin në mënyrë të rregullt për disa vite me radhë, jeni një person tek i cili do të rriten mundësitë për tu prekur nga ky lloj kanceri.
Etnia – Edhe origjina etnike ka një ndikim të madh në mundësitë për tu prekur nga kanceri. Për shembull, meshkujt me origjinë kaukaziane janë zbuluar se kanë shanse më të mëdha për tu prekur nga ky lloj kanceri.
Simptomat
Nëse vini re ndonjë nga simptomat e mëposhtme, duhet të shkoni menjëherë tek mjeku
Enjtje apo inflamacion – Nëse vini re se keni enjtje apo inflamacion të organeve gjenitale, tregoni kujdes të madh dhe pyesni mjekun.
Sëmundje të vazhdueshme apo lodhje – Sëmundja e vazhdueshme apo lodhja janë shenjat më të shpeshta që shoqërojnë çdo lloj kanceri.
Ankth, dhimbje apo humbje peshe – Nëse vini re një nga këto shenja, shkoni menjëherë tek mjeku.
Vetëkontrollimi
Këshillohet që të kontrolloni organet gjenitale çdo muaj për të vënë re nëse ka ndonjë shenjë jo normale në to. Ndiqni metodat e mëposhtme:
Duhet të ndiheni të qetë dhe të relaksoheni përpara se të nisni vetëkontrollin.
Ngrini njërin nga testikujt duke përdorur tre gishta – të madhin, të mesit dhe gishtin tregues
Rrotulloni gishtat në mënyrë që të nisni të ndieni testikujt.
Rrotulloni gishtat për të vënë re nëse diçka ju dhemb, nëse keni ndryshime në madhësi apo edhe masa ë reja që nuk i keni vënë re më parë.
Kontrolloni të dy testikujt me të njëjtën metodë.
Bëjeni këtë kontroll një herë në muaj dhe shkoni me vrap tek mjeku përpara se të jetë tepër vonë. Mbani parasysh se kanceri në testikuj është një lloj kanceri i cili mund të eliminohet tërësisht nëse kapet që në fazat e para./tesheshi.com/
