Ka shumë arsye për të falenderuar Leonardo da Vincin. Shpikësi italian gjatë jetës së tij ka realizuar dhe projektuar shumë objekte, të cilat sot i përdorim rëndom në mënyrë të përditshme. Ndaj, pa aftësinë e madhe të shkencëtarit dhe artistit, ndoshta nuk do të mund të arrinim kurrë të fluturonim apo të bënim një xhiro me makinë në ditët e sotme. Në 15 prill të vitit 1452 është ditëlindja e Da Vincit, ndaj me këtë rast vendosëm t’ju prezantojmë me 5 shpikje të mrekullueshme që ai ka bërë dhe janë përcjellë deri në ditët e sotme.
5 – Tanku
Edhe pse Leonardo ishte pacifist, ai nuk ia hoqi vetes mundësinë e krijimit të makinave tmerruese të luftës, siç ishte edhe tanku. Tanku i Leonardo da Vincit mund të spostohej dhe të qëllonte në të gjitha drejtimet, i manovruar nga 8 burra që duhej ta shtynin me forcën e krahëve të tyre.
4 – Veshjet e zhytjes
A i keni parasysh videot dhe fotot e zhytësave që shikoni në internet dhe në mëngjes ju vjen dëshira për të bërë edhe ju një zhytje në det? Epo, nëse Leonardo da Vinci nuk do të kishte lindur, ndoshta sot nuk do të kishim një palë veshje zhytjesh. Veshja që shpikësi krijoi përbëhej nga xhaketa, pantallona dhe maskë me syze të bashkuara në një skafandër. Në atë kohë ka qenë vetë shpikësi që i ka realizuar këto prototipe, siç përshkruhet edhe në Kodin Atlantik (fq. 909)
3 – Automobili
Edhe automobilat që sot i drejtojmë ne, janë krijuar për herë të parë nga Leonardo, ose më mirë të themi, janë projektuar nga ai. Automobili i parë është krijuar shumë kohë më pas, ndërsa automobili i kohës së Da Vincit ishte një lloj karakatine, pra një lloj objekti teatral i përdorur për tu bërë përshtypje spektatorëve.
2 – Biçikleta
Projekti i biçikletës është krijuar pikërisht nga Leonardo Da Vinci dhe është identik me modelin aktual të biçikletave, vetëm me disa detaje ndryshe.
1 – Helikopteri
Një nga shpikjet më të famshme të gjeniut italian janë edhe krahët ajrorë. Zhvillimi i tyre ka krijuar helikopterin apo avionët e sotshëm. /tesheshi.com/
