Edhe pse PD nuk e ka kontestuar si 5 majin datë, madje e respekton atë si Ditë Dëshmorës përcaktuar e tillë nga ish-regjimi komunist, kreu demokrat Basha zgjodhi t’i devijojë homazhit klasik duke bërë përzgjedhje të veçanta, siç te varri Azem Hajdarit, te ai i 22 deputëteve të pushkatuar nga ish-regjimi, apo te varri i ish-ushtarakut të vrarë në Afganistan Feti Vogli.
Nga PD u raportua se “kreu i PD vendosi kurora me lule në monumentin “Nënë Shqipëri”, tek varrezat ‘Dëshmorët e Kombit’, si dhe u përkul me nderim përpara përmendores së Azem Hajdari.
Kreu i opozitës vendosi një kurorë me lule edhe në nderim të 22 intelektualëve të pushkatuar pa gjyq nga diktatura komuniste pas bombës në ish-ambasadën sovjetike, në simbol të nderimit të opozitarizmit dhe shprehjes së lirë.
Ky 5 maj, i kremtuar pa ceremonitë e zakonshme për shkak të Covid-19, ishte një rast që Kryetari i Partisë Demokratike të vendoste lule në nderim të kapiten Feti Voglit, i cili ra në krye të detyrës në Afganistan, në një mision të Shqipërisë si anëtare me të drejta të plota në NATO.
Kreu i opozitës nderoi gjithashtu të rënët në luftën për çlirimin e Kosovës, të cilët prehen në Varrezat e Dëshmorëve të Kombit dhe vendosi lule në varrin e Dëshmorit te Atdheut Skerdilajd Llagami, i rënë në luftën për çlirimin e Kosovës”.
Nga ana tjetër, krerët e së majtës, Rama, Meta e Rruci, kryen homazhet e tyre duke qenë në krah të njëri-tjetrit. /tesheshi.com/
