E diela në Sidney ishte dita më e nxehtë që nga viti 1939, ku temperatura në periferi arriti 47.3 gradë celsius dhe për shkak të nxehtësisë u ndërpre edhe Turneu i Tenisit, “Australian Open”.
Instituti Meteorologjik njoftoi të dielën se kjo ishte dita më e nxehtë në zonën e Sidneit, kur temperatura arriti 47, 1 gradë në periferinë perëndimore të Penrith.
Në stadiumin ku mbahen ndeshjet e kriketit, u shënua 57.6 gradë celsius në mes të fushës.
Turneu i tenisit u pezullua gjithashtu kur temperaturat tejkaluan 40 gradë Celsius. Francezja Kristina Mladenoviç, lojtarja e 11-të në botë e ndërpreu ndeshjen dhe shkroi në Twitter, “ishin 43 gradë dhe ndoshta 50 gradë në fushë kur fillova ndeshjen”, duke shprehur kështu keqardhje për tifozët e saj, raporton AFP.
Mbi 200 rekorde të temperaturës janë thyer në të gjithë Australinë midis dhjetorit të vitit 2016 dhe shkurtit të vitit 2017, me valë termike, zjarre dhe përmbytje gjatë muajve të verës.
Ekspertët kanë paralajmëruar se temperaturat e tokës dhe detit janë të prekur nga ndryshimet klimatike, që çojnë në kushte edhe më ekstreme të motit.
Për shkak të popullsisë relativisht të vogël (24 milionë banorë) në raport me sipërfaqen e saj dhe varësinë e saj të lartë nga qymyri si një burim energjie, Australia është një nga ndotësit më të mëdhenj të gazrave serë në botë për kokë banori. /tesheshi.com/
