Shqipëria do të çojë një togë këmbësorie të Forcave të Armatosura me mision në Herat të Afganistanit. Në një vendim të saj të mbledhjes së 13 korrikut, qeveria miratoi edhe masën e shpërblimit prej 12 mijë lekësh të reja për ushtarakët që do të shkojnë atje, përveç pagës mujore dhe përfitimeve të tjera që do të mbulojë vetë Ministria e Mbrojtjes me buxhetin e saj. Sipas vendimit, misioni do të përbëhet nga 40 ushtarakë, që do të instalohen pranë Komandës së Trajnim-Këshillimit dhe Ndihmës në Herat, Afganistan.
Kohëzgjatja e këtij misioni është deri në 4 (katër) vjet, afat i cili fillon të llogaritet nga data e dërgimit të kontingjentit të parë në Afganistan.
Periudha e qëndrimit në mision për çdo kontingjent do të jetë me sistem rotacioni në çdo 6 (gjashtë) muaj, periudhë së cilës i shtohen edhe ditët e qëndrimit për ndërrimin me kontingjentin e radhës (marrjen dhe dorëzimin e detyrës, vonesa të transportit strategjik).
Ministria e Mbrojtjes do të duhet të bëjë sigurimin e jetës nga aksidentet për ushtarakët e Forcave të Armatosura të Republikës së Shqipërisë, të cilët do të marrin pjesë në këtë mision. /tesheshi.com/
