Kryeministri Albin Kurti ka bërë të ditur se nëse rizgjidhet në krye të qeverisë, më shumë se një miliard euro do të ndahen nga buxheti për Forcën e Sigurisë së Kosovës, transmeton Radio Evropa e Lirë.
Në mbledhjen e qeverisë, ku ka folur për të arriturat e deritanishme të mandatit të tij katërvjeçar, Kurti ka vlerësuar se janë arritur “rezultate të jashtëzakonshme”.
“Buxheti ushtarak është trefishuar, trajnimet jashtë vendit janë katërfishuar, investimet në armatim janë shtuar shumëfish, përfshirë dronët luftarakë Bajraktar dhe marrëveshjen për ndërtimin e fabrikës së municionit”, tha Kurti.
Ai nënvizoi se “për ushtrinë në mandatin e ri do të ndahen mbi një miliardë euro”, se do të ndërtohet një fabrikë municioni dhe se do të prodhohen dronët ushtarakë “Made in Kosova”.
Në vitin 2024, buxheti për Ministrinë e Mbrojtjes së Kosovës ishte 153 milionë euro, ndërsa për këtë vit janë planifikuar 207.8 milionë euro.
Në nëntor 2024, Kosova filloi procesin e hapjes së një fabrike të prodhimit të municioneve dhe nënshkroi një kontratë municioni me një prodhues në Turqi – shteti nga i cili Kosova ka blerë drone për ushtrinë e saj. Qeveria njoftoi gjithashtu se do të ketë një laborator për projektimin e mjeteve ajrore pa pilot, të njohur si dronë.
Krahas kërkimit të prodhimit të armëve dhe municioneve të veta, Kosova aktualisht po merr edhe armë të ndryshme. Procesi i blerjes së mbi 200 sistemeve kundërajrore Javelin nga Shtetet e Bashkuara është duke u zhvilluar. Javelin njihet për aftësinë e tij për të operuar kundër automjeteve të blinduara dhe Kosova do të ndajë 75 milionë dollarë për blerjen e saj.
Kurti ka thënë në mbledhjen e Qeverisë se Kosova planifikon të blejë helikopterë amerikanë “Black Hawk” për nevojat e Forcave të Sigurisë së Kosovës.
Kosova ka ndërmarrë disa hapa gjatë javëve të fundit për të përmirësuar mbrojtjen dhe sigurinë e saj. Për këtë, u miratua nisma për lidhjen e një marrëveshjeje gjithëpërfshirëse për thellimin e bashkëpunimit me SHBA-në në fushën e mbrojtjes dhe sigurisë, si dhe u nënshkrua një deklaratë për thellimin e bashkëpunimit në fushën e mbrojtjes dhe sigurisë me vendet e rajonit që janë pjesë e Organizatës së Traktatit të Atlantikut të Veriut (NATO), Shqipërinë dhe Kroacinë.
Marrëveshja me SHBA-në, sipas qeverisë, do ta ndihmojë Kosovën të ndërtojë kapacitete strategjike ushtarake, ndërsa deklarata për bashkëpunim me Shqipërinë dhe Kroacinë duhet “të kontribuojë për paqen në rajon”.
Beogradi zyrtar ka kritikuar këto përpjekje të Kosovës për të forcuar industrinë e mbrojtjes dhe të armëve.
Serbia e sheh deklaratën e bashkëpunimit me Shqipërinë dhe Kroacinë si një hap që “minon stabilitetin rajonal” dhe një “provokim”. /tesheshi.com/
