Fenomeni trishtues i adoleshentëve me thika, të prirur për sherre, u shpërfaq tragjikisht paraditen e kësaj të hëne në Tiranë, ku një përleshje mes tyre te shkolla “Fan Noli” përfundoi tragjikisht me një të vdekur dhe një të plagosur.
Viktimë mbeti 14-vjeçari me inicialet M.C., i cili u godit me thikë në zemër dhe kësisoj ndërroi jetë.
Konflikti mes adoleshentëve filloi brenda ambienteve të shkollës dhe më pas u zhvendos jashtë saj, ku u përshkallëzua duke përdorur armë të ftohta.
Gjatë përplasjes mbeti i plagosur edhe shoku i viktimës, 14-vjeç me iniciale L.M., i cili po merr trajtimin e nevojshëm mjekësor në spital. Ai ka disa plagë me thikë në gjoks, por ndodhet në gjendje të qëndrueshme, jashtë rrezikut për jetën.
Ata u qëlluan nga dy bashkëmoshatarë të tjerë.
Në njoftimin zyrtar të Policisë, thuhet:
“Më datë 18.11.2024, rreth orës 13:10, në rrugën ‘Qemal Stafa’, rreth 200-300 metra larg shkollës ‘Fan Noli’ janë konfliktuar 3 shtetas të moshës 14 vjeç.
Si pasojë e dëmtimeve të marra gjatë konfliktit, ka ndërruar jetë njëri prej tyre ndërsa tjetri ndodhet në spital, në kujdesin e mjekëve.
Është shoqëruar njëri nga autorët e dyshuar, ndërsa grupi hetimor po vijon punën për sqarimin e rrethanave të konfliktit”. /tesheshi.com/
