Kosova braktisi përballjen me Rumaninë në kuadër të Ligës së Kombeve, të premten mbrëma, teksa afrohej fundi i ndeshjes ku rezultati ishte i bardhë, 0-0.
Shkak u bënë thirrjet raciste të tifozerisë rumune pas portës së Kosovës, ku dëgjohej dhe “Serbia, Serbia”, apo “Kosova është Serbi”. Ndodhi kjo pasi një monenti tensioni në fushë që çoi në dy kartona të verdhë.
🇷🇴🇷🇸 Kosovo players start chimping out and leave the field before the match ends as Romanian fans start chanting "Serbia, Serbia, Serbia!" pic.twitter.com/2gvH53y8qA
— Daily Romania (@daily_romania) November 15, 2024
Protagonist i kthesës së lojës, deri në braktisje, ishte kapiteni Amir Rrahmani, sipas së cilit, nga tifozeria rumune janë dëgjuar dhe ofeza shumë të rënda, të atilla sa nuk thuhen.
Pritja që ekipi kosovar të kthehej në fushë zgjati rreth një orë, por pa rezultat. Kështu, tashmë UEFA duhet të marrë një vendim, ku padyshim që do merret si referencë precedenti i takimit të anulluar Serbi-Shqipëri në Beograd, në 2015-ën. Atëherë, ndaj futbollistëve kuqezi u ushtruar dhunë edhe fizike, duke u qëlluar me sende nga tifozeria. Në travolinë, UEFA vendosi që Shqipërisë t’i jepej fitorja 3-0. Rasti me Kosovën është i përafërt, pasi është dhe e disata herë që tifozeria rumune, apo ndonjë tjetër, lëshojnë thirrje të ulëta ndaj përfaqësueses kosovare, të natyrës raciste.
Loja
Në lojë, Kosova i bëri zbor ekipit rumun, prej të cilit, krejt çuditërisht, duke parë nivelin e mbrëmshëm, u mund 3-0 në takimin e parë, në Prishtinë. Kosova ishte superiore në çdo drejtim, që nga minuta e parë e deri në fund, ku paradoksalisht, vetëm goli mungoi, i cili, siç thuhet në të tilla raste, thjesht nuk donte të futej në portën rumune. Diferenca mes lojës së dy ekpieve që tejet e dukshme, me një Kosovë që i dha leksion rumunëve, gjë që mund të ketë ndikuar dhe në psiqikën e rënduar të tifozerisë, e cila zgjodhi të hakmarrej në formën e thirrjeve raciste.
Ndaj, nëse Kosova e merr në tavolinë këtë ndeshje, do ta kishte krejtësisht të merituar dhe në emër të lojës. 3-0 për Kosovën do ishte rezultati logjik i asaj që ndodhi në fushë në 80 e ca minuta, afër fundit, kur dhe ndodhi kthesa.
Leksion dhe Shqipërisë
Kosova, mbrëmë me Rumaninë, në fushën e lojës, i dha një leksion dhe Shqipërisë. Një ndëshje të atij niveli, në gati ‘90 minuta, kombëtarja shqiptare zorr se e ka arritur ndonjëherë. Shqipëria e mundi Rumaninë në Europianin e 2016-ës, me golin e Armando Sadikut, por rumunët patën një lloj epërsie ndaj Shqipërisë, gjithsesi. Ndërsa mbrëmë, Kosova ishte shpirt e spektakël bashkë, e jo ndaj një ekipi dosido. Rumania, edhe pse në kohërat e veta jo më të mira, mbetet një ekip imponues qoftë dhe nga emri që ka lënë në futbollin europian, sidomos pas viteve ’90. Por mbrëmë u konfirmua dhe ajo që përflitet prej vitesh mbi futbollin shqiptar: ndikimi kosovar në rritjen e kombëtares shqiptare. Po, u konfirmua mbrëmë. Futbolli kosovar është dhe duhet të jetë referenca bazë e futbollit shqiptar.
Komentimi, leksion tjetër
Një leksion për Shqipërinë ishte dhe komentimi i ndeshjes. Pra, për komentatorët shqiptar. Ai kosovar ishte një komentim i shtruar, racional, pa emotivitete bezdisëse në kantilenat e komentuesit dhe pa fraza parazitare, të tilla si “kjo ndeshje po transmetohet nga x television”. Ishte një koment që gjithashtu tentonte të zbërthente aspekte taktike të lojës, gjë që nuk haset kurrë te komentatorët e futbollit në Shqipëri. /tesheshi.com/
