Agjencia Kosovare e Privatizimit (AKP), në vazhdën e aktiviteteve të saj, do të bëje ekzekutimin e vendimit të Dhomës së Posaçme të Gjykatës Supreme të Kosovës për shpërndarje të fondeve të tjera nga pjesa e 20 % të dedikuara për punëtorët e Ndërmarrjeve Shoqërore.
Pas lëshimit të vendimit të plotfuqishëm nga Dhoma e Posaçme e Gjykatës Supreme të Kosovës lidhur me ankesat dhe kundërshtimet e punëtorëve të këtyre NSh-ve, agjencia ka përgatitur dokumentacionin e nevojshëm për shpërndarjen e fondeve të 20% për punëtorët e kualifikueshëm edhe për 7 ndërmarrje shoqërore.
“Shuma e fondeve që do të shpërndahen kësaj radhe është 717 mijë e 459 (shtatëqind e shtatëmbëdhjetë mijë e katërqind e pesëdhjetë e nëntë euro), kurse nga kjo shpërndarje do të përfitojnë një numër prej 380 punëtorëve. Sipas procedurave te legjislacionit në fuqi, transferi i këtyre fondeve do të bëhet në llogarinë e Bashkimit të Sindikatave të Pavarura të Kosovës (BSPK), në pajtim me nenin 10.5 të Rregullores nr. 2003/13 (me ndryshime)”, thuhet në njoftimin e AKP-së.
Deri më tani AKP ka shpërndarë rreth 104 milionë euro për më shumë se 43 mijë punëtorë dhe ish-punëtorë të NSh-ve. Në ndërkohë, kjo agjenci është në proces të përgatitjes së dokumentacionit për shpërndarjen e fondeve të 20 për qind për punëtorët e kualifikueshëm edhe të 3 NSh-ve tjera, për çka punëtorët e këtyre NSh-ve dhe opinioni i gjerë do të informohen me kohë. /tesheshi.com/
