Kur një futbollist shndërrohet në ikonë apo referencë e dashurisë së madhe për një klub, mund të përfundojë në urrejtje dhe zemërim aq të madh sa që mund të bësh gati litarin për varrjen e tij. Një fat të tillë e ka përjetuar në fundjavë, futbollisti francez Mathieu Valbuena që ka hyrë në mesin e futbollistëve që u pritën si tradhëtarë në vendin ku cilësoheshin si heronj.
“Tesheshi.com”, ua sjell reagimet më të egra të tifozëve ndaj ish-lojtarëve të tyre:
Mathieu Valbuena
Pas tetë sezoneve të kaluara tek Olimpique Marseille, mesfushori francez është rikthyer në Stade Velodrome, por kësaj rradhe duke bartur mbi supe një fanelë tjetër, atë të Lyonit, rivalit të përbetuar të marsejezëve. Tifozët u treguan shumë të ashpër me të, duke e quajtur “tradhëtar” njeriun që dikur i ngjallte dashurinë për klubin Marseille. Madje, tifozët ultras të klubit kishin vendosur një shëmbëlltyrë të lojtarit i cili ishte i varur për litari dhe një pankartë në të cilën shkruhej: “Vetëm marsejezët e vërtetë luajnë për Olimpique Marseillen, ndërsa ti nuk je asgjë tjetër pos një tradhëtar”.
Luis Figo
Pritja më e shëmtuar që ka mundur t`i bëhet një ish-futbollisti, pa dyshim është ajo e tifozëve të Barcelonës ndaj futbollistit portugez, Luis Figo. Katalunasit nuk mund ta imagjionin që ikona e tyre kishte ndërruar ngjyrë, barte petkun e rivalit të përbetuar Real Madridit. Figo u vërshëllye gjatë gjithë ndeshjes, ndërkohë në një moment kur bëhej gati të kryente një goditje nga këndi, ai u gjuajt me një kokë derri.
Steven Defour
Pesë sezone të kaluara në Standard Liege, dy herë kampion i ligës; për më tepër, kapiten dhe simbol i tifozëve të kuq. Bëhet fjalë për futbollistin Steven Defour që kishte kaluar më pas tek skuadra portugeze Porto, për t`u rikthyer më në Belgjikë tek Anderlecht, rivali i përbetuar i Standardit. Në rikthimin e tij të parë në shtëpinë e dikurshme ishte një ferr i vërtetë. Tifozët ishin mobilizuar, kishin ngritur një pankartë të madhe në të cilën thuhej “I kuq ose i vdekur” me imazhin e personazhit të filmave Jason Veirnes 13 , i cili mbante kokën e prerë të Defour.
Sol Campbell
Pas nëntë sezoneve të kalura tek Tottenham Hotspur, Soll Campbell konsiderohej si një ikonë e klubi nga veriu i Londrës. Por, kalimi i tij tek Arsenali, rivali i përbetuar i Spursave e ka shndërruar atë në një tradhëtar të përjetshëm. Në rikthimin e tij të parë në White Hart Lane, ai kishte përjetuar tmerrin me sy. Pos vërshëllimave drithëruese, publiku gjithashtu mbante në duar pankarta në të cilën shkruhej “tradhëtar”.
Mario Gotze
Futbollisti i talentuar gjerman kishte kaluar katër sezone fantastike tek Borussia Dortmund dhe ishte bërë njëri ndër lojtarët më të dashur në Signal Iduna Park. Por, kalimi i tij tek Bayern Munich nuk është pritur aspak mirë nga tifozët verdhezinj. Ata kishin konsideruar si tradhëti kalimin e tij në Alianz Arena, për të tepër që kishte ndërruar mjedis për shkak të kushteve financiare. Në rikthimin e tij të parë në shtëpinë e vjetër, ai nuk u prit aspak mirë nga tifozët ultras që kishin përgatitur shumë banderola kundër tij, por kryesorja ishte: “Shko në djall Gotze”.
/tesheshi.com/
