“Mbreti i salloneve për rrezitje” P. G., 74 vjeç, u gjet i vdekur të mërkurën në vilën e tij në lagjen luksoze Hahnwald të Këlnit. Policia dyshon për vrasje.
Themeluesi i një zinxhiri të njohur të rrezitjes në Gjermani është gjetur mëngjesin e së mërkurës në një gjendje të pajetë në vilën e tij, shkruajnë mediat gjermane.
Një punonjës zbuloi trupin rreth orës 9:15 në një vilë në Hahnwald, një nga lagjet më luksoze të qytetit, ku jetojnë njerëz të famshëm.
Zona është e njohur për pronat e siguruara mirë. Policia e Kolnit formoi një ekip për të hetuar vrasjen.
“Pas vlerësimit të provave të deritanishme, mund të supozohet se një ose më shumë persona të panjohur i janë afruar shtëpisë së familjes dhe kanë vepruar dhunshëm ndaj pronarit të shtëpisë që kanë hasur”, ka thënë policia.
Nuk dihet ende asgjë për autorët dhe motivin e mundshëm. Hetimi është në vazhdim. P. G. konsiderohej një person i rëndësishëm në shoqërinë e Kolnit. Ai fitoi miliona me zinxhirin e salloneve të tij për rrezitje dhe i lejonte vetes një jetë luksoze.
