Ish-mesfushori i Barcelonës dhe Kombëtares spanjolle të futbollit, 40-vjeçari Andres Iniesta, njoftoi të martën fundin e karrierës së tij si lojtar pas 24 vitesh të mbushura me trofe.
Iniesta ishte një nga lojtarët kryesorë në mesfushën e Spanjës dhe Barcelonës gjatë periudhave të suksesit të vazhdueshëm për të dyja skuadrat në fund të viteve 2000 dhe në fillim të viteve 2010.
“Ju lutem më lejoni të jem pak emocional sot,” tha një Iniesta i përlotur në një konferencë për shtyp, i cili kohët e fundit ka luajtur për Emirates Club në Emiratet e Bashkuara Arabe.
“Kurrë nuk e kisha menduar se do të vinte kjo ditë. Nuk e kisha imagjinuar kurrë. Po, gjithë këta lot janë lot emocioni, krenarie, nuk janë lot trishtimi. Janë lotët e atij djalit nga një qytet i vogël si Fuentealbilla, i cili ëndërronte të bëhej futbollist dhe ia arriti pas shumë mundi dhe sakrificash, pa u dorëzuar kurrë. Ndihem shumë krenar për këtë rrugëtim, me të gjithë njerëzit që më ndoqën”, tha Iniesta.
Ai luajti 131 ndeshje dhe shënoi 13 gola për kombëtaren spanjolle dhe ishte shënuesi i golit të vetëm në finalen e Kupës së Botës 2010, i cili i solli vendit të tij fitoren ndaj Holandës dhe titullin e parë të kampionatit botëror.
Ai gjithashtu luajti një rol kyç në triumfin e Spanjës në Kampionatin Evropian në vitin 2008 dhe u shpall lojtari më i mirë i Euro 2012 në Poloni dhe Ukrainë, kur spanjollët mbrojtën titullin e tyre.
El Juego Continúa ❤️⚽️ 8️⃣🔟2️⃣4️⃣ pic.twitter.com/YLrDOfxVCB
— Andrés Iniesta (@andresiniesta8) October 7, 2024
I lindur në fshatin e vogël Fuentealbilla, më pak se një orë me makinë në juglindje të kryeqytetit Madrid, Iniesta iu bashkua akademisë së të rinjve të Barcelonës në La Masia në moshën 12-vjeçare dhe bëri 674 paraqitje për skuadrën katalane, duke qenë kapiten i saj për tre sezone.
Një vit para se të bëhej heroi i Spanjës në finalen e Kupës së Botës, Iniesta bëri diçka të ngjashme për Barcelonën në gjysmëfinalen e Champions League kundër Chelsea. Goditja e tij e shkëlqyer në kohën shtesë i siguroi Barçës një vend në finalen e Ligës së Kampionëve ku fituan trofeun, i pari në karrierën e Pep Guardiolës si trajner në kompeticionin elitar evropian. /tesheshi.com/
