Shqyen sytë robi normal kur sheh një status tipik prej polici të Policisë së Shtetit – ndjesë për të gjithë ata policë dinjitozë në nivel të menduari dhe ushtrim detyre – ku propaganda e një niveli sipëror, deri në neveri, është përzierë me një budallallëk tipik shvejkian, jo të Shvjekut por personazheve të tij.
E para, Bibloteka nuk vizitohet por frekuentohet. Por nuk ka sesi të ketë korrektesë gjuhësore në një nivel të tillë budallallëku me brirë. Po pse, çfarë pritet të ndodhë në Bibliotekën Kombëtare që aty duhet të shkojnë patrulla policore?!
Në ç’rast paska ndodhur që një biblikotekë qenka bërë objektiv krimi?
Mbi ç’indicie duhet që Policia t’i qaset dhe Bibliotekës Kombëtare për të garantuar siguri?!
Dhe në fund, kujt i shkon mendja për këto idiotësi aty, pra në Policinë e Shtetit?!
Kjo të fut trishtimin se ç’nivele mendore plot pikëpyetje menaxhojnë sigurinë publike.
Në Shqipërinë tonë jo aq të madhe, madje të vogël duhet thënë, është shumë ë qartë, për këdo, se çfarë tenton krimi dhe ku endet ai, ku e ka ngritur perandorinë e tij. Kështu që ky status është aq fyes për inteligjencën e përgjithshme sa jo për krimin por për vetë çfarë i serviret publikut nga Policia e Shtetit, aty duhej të kishte furtunë shkarkimesh. /tesheshi.com/
