Ministri i Vetëqeverisjes Lokale në Kosovë, Elbert Krasniqi, ka bërë të ditur se pas një operacioni të Policisë së Kosovës janë mbyllur disa objekte të institucioneve paralele serbe në veri të Kosovës.
Krasniqi në një postim në Facebook ka sqaruar se bëhej fjalë për mbylljen e disa institucioneve paralele që ishin nën direktivën e Serbisë.
“Sot, pas një koordinimi të ngushtë ndërmjet institucioneve të Republikës së Kosovës, janë mbyllur institucionet paralele ilegale të vetëqeverisjes lokale që kanë vepruar sipas direktivave serbe, duke shkelur kushtetutshmërinë dhe ligjet e Republikës së Kosovës”, ka shkruar Krasniqi.
Krasniqi tha se komunat paralele që nuk do të funksionojnë më janë: Qarku i Mitrovicës së Kosovës, komuna paralele e Mitrovicës, komuna paralele e Zveçanit, komuna paralele Zubin Potok, komuna paralele Leposaviq.
Këtyre 5-ve sot u janë bashkuar edhe shtatë komuna të tjera paralele që janë mbyllur në Prizren, Pejë, Suharekë, Istok, Klinë, Rahovec dhe Dragash.
Krasniqi premtoi se institucionet e Kosovës do të ofrojnë shërbime për të gjithë qytetarët pa dallim, përfshirë edhe ata serbë.
“Institucionet e Republikës së Kosovës ofrojnë shërbime për të gjithë qytetarët, pa dallim. Ato janë adresa e duhur për të gjitha kërkesat dhe nevojat e qytetarëve tanë. Ne mbetemi të përkushtuar për sa më shumë shërbime me cilësinë më të lartë. Qytetarët pa dallim e kanë adresën e saktë se ku mund të marrin shërbimet komunale dhe strukturat paralele e bëjnë të qartë se nuk mund të veprojnë jashtë kornizës ligjore të Republikës së Kosovës”, ka theksuar Krasniqi.
Ministri i Administratës Lokale më tej tha se nuk ka vend për operime ilegale dhe shërbime paralele në asnjë zonë të Republikës së Kosovës.
Drejtori i Zyrës për Kosovën në Qeverinë e Serbisë, Petar Petkoviç, tha se mbyllja e institucioneve serbe në veri të Kosovës do të ketë “pasoja të gjera në normalizimin e marrëdhënieve ndërmjet Beogradit dhe Prishtinës”.
“Albin Kurti filloi të mbyllë të gjitha institucionet serbe në veri të krahinës, të cilat nuk janë institucione paralele, por institucione që duhet të jenë bazë për formimin e Bashkësisë së Komunave me shumicë serbe”, tha Petkoviç.
Ai shtoi se institucionet e mbyllura u ofronin serbëve në Kosovë “një minimum shërbimesh publike dhe ekzistenciale siç janë përfitimet sociale përmes pagave dhe pensioneve”.
Paraprakisht, Policia e Kosovës ka bërë të ditur se me kërkesë të Ministrisë së Administratës dhe Pushtetit Lokal ka zhvilluar një aksion policor në katër komuna në veri të Kosovës.
“Qëllimi i aksionit policor është vendosja e rendit dhe ligjshmërisë dhe ndalimi i aktiviteteve në pesë objekte që shfrytëzohen si komuna ilegale dhe që cenojnë rendin kushtetues dhe juridik”, njofton Policia.
Në fillim të këtij viti, autoritetet e Kosovës mbyllën shtatë komuna të tjera paralele serbe në pjesë të tjera të vendit, si Prizren, Pejë, Suharekë, Istok, Klinë, Rahovac dhe Dragash. /tesheshi.com/
