Ish-trajneri i Anglisë, Sven-Göran Eriksson, ka vdekur në moshën 76-vjeçare, njoftoi familja e tij. Eriksson vuante nga kanceri i pankreasit dhe në fillim të vitit zbuloi se i kishte mbetur maksimumi një vit jetë.
“Sven-Göran Eriksson ka ndërruar jetë”, tha familja në një deklaratë. “Pas një sëmundje të gjatë, SGE ndërroi jetë mëngjesin e sotëm në shtëpi, i rrethuar nga familja e tij”.
Familja ka kërkuar që të respektohen dëshirat e tyre për pikëllimin privat dhe të mos kontaktohen.
Eriksson u bë trajneri i parë i huaj i kombëtares angleze të futbollit në vitin 2001, duke udhëhequr një “gjeneratë të artë” lojtarësh si David Beckham, Steven Gerrard, Ëayne Rooney dhe Frank Lampard.
Gjatë karrierës së tij, ai drejtoi një numër klubesh të njohura evropiane si Benfica, Roma, Fiorentina, Sampdoria dhe Lazio.
Eriksson u largua nga kombëtarja e Anglisë pas Kupës së Botës 2006, dhe më pas drejtoi Meksikën dhe Bregun e Fildishtë, si dhe klubet angleze Manchester City dhe Leicester City.
Për shkak të problemeve shëndetësore, ai u tërhoq nga posti i drejtorit sportiv të klubit suedez Karlstad në shkurt të vitit 2023.
Pasi njoftoi diagnozën e tij të kancerit, Eriksson përmbushi dëshirën e tij të kahershme kur udhëhoqi Liverpool Legends në një ndeshje bamirësie kundër Ajax në Anfield në mars. Ai e përshkroi momentin si “absolutisht të mrekullueshëm” dhe “një kujtim të madh” të jetës së tij, me Liverpoolin që fitoi 4-2.
Eriksson dërgoi një mesazh lamtumire dhe tha se shpresonte të mbahej mend si një “njeri i mirë”. “Kam pasur një jetë të mirë. Mendoj se të gjithë kemi frikë ditën kur vdesim, por jeta ka të bëjë edhe me vdekjen,” tha ai në dokumentarin “Sven” në Amazon Prime.
Ai shtoi: “Shpresoj që më në fund njerëzit të thonë: ‘Po, ai ishte një njeri i mirë’, por jo të gjithë do ta thonë këtë.”
“Buzëqeshni, mos u trishtoni. Faleminderit të gjithëve, trajnerëve, lojtarëve, turmës, ishte fantastike. Kujdesuni për veten dhe jetën tuaj. Jetoni atë. Mirupafshim.”
