Erjon Veliaj, njeriu që drejton Tiranën dhe ndër emrat më potentë të mazhorancës, kaloi pothuajse një ditë në SPAK, hera e parë e tij në Prokurorinë e Posaçme, shndërruar në ankth për zyrtarë e qeveritarë, të djeshëm e aktualë, të pushtetit dhe opozitës.
U fut paraditë e doli pasdite prej atyre, duke deklaruar para mediave, gazetarë të të cilave e pritën me orë që të dalë e ta intervistojnë.
Aty, siç tha, është pyetur për inceneratorët, afera e së cilave ka ngrënë deri në tani disa koka.
“Patëm një ezaurim total të çështjes së inceneratorëve, të gjithë shpjegimet e nevojshme për mënyrën se ku dallon projekti i IFC-së, i cili u rrëzua dhe ishte nisur nga ish-bashkia me 37 euro/toni dhe që kjo ishte krejtësisht diçka tjetër e pa kërkuar nga investitorë të tjerë që s’kishin lidhje me bashkinë dhe as IFC. Sigurisht që u thanë edhe disa detaje të tjera”, tha Veliaj, duke shtuar më tej sfidueshëm:
“Ndihem vërtetë mirë që unë dhe ata që më duan ndihen më të lehtësuar. Unë ndihem më i lehtësuar se pata edhe unë mundësin më në fund të them fjalën time. Armiqtë e mi gjithashtu ndihen më të lehtësuar, se unë besoj se një njeri duhet gjykuar edhe nga armiqtë që bën jo vetëm nga punët që bëjmë”. /tesheshi.com/
