Për herë të parë në postkomunizëm, një emër për ambasador amerikan në Shqipëri ka ngecur në Senat, duke mos u aprovuar aty.
Kështu, David Kostelancik, kandidaturë e propozuar nga Joe Biden për ambasadorin e ri në Shqipëri, nuk mund të jetë i dërguari kryesor diplomatik i Uashingtonit në Tiranë, si pasues i Yuri Kim.
Megjithatë, kjo do të shihet nëse emri i tij do propozohet sërish, pasi mosmiratimi në Senat është konsideruar si akt procedurual.
Kujtojmë se prej muajsh, që pas largimit të Yuri Kim, selia diplomatike e SHBA në Shqipëri drejtohet nga i ngarkuari me punë David Wisner.
Kostelancik njihet si diplomat me një karrierë 30-vjeçare. Në Shqipëri ka shërbyer edhe më përpara në periudhën 1992-1994, si përfaqësuesi i parë për çështjet politike dhe ekonomike në ambasadën e porsahapur amerikane në Tiranë. Para emërimit si ambasador nga Biden, i shërbente si Këshilltar për Politikën e Jashtme i Shefit të Shtatmadhorisë amerikane, Gjeneralit Mark Milley. Diplomati Kostelancik, me origjinë nga shteti i Ilinoit, është diplomuar në Universitetin Northwestern të këtij shteti. Ai flet rusisht, hungarisht, shqip dhe turqisht.
Duke qenë se kandidatura e tij nuk u miratua nga Senati, procedura parashikon se presidenti i SHBA Biden mund të çojë sërish të njëjtin emër, atë të diplomatit Kostelancik ose emër tjetër për të marrë miratimin e senatit si ambasador amerikan në Tiranë. /tesheshi.com/
