Ministri i Rendit Taulant Balla e ka konsideruar si të papranueshëm që në kushte arresti shtëpie, Berisha del në dritare dhe komunikon me militantët poshtë pallatit ku ai banon, në rrugën “Mustafa Matohiti”.
“Kam dëgjuar shumë intepretime nga mediat për mënyrën e zbatimit të arrestit në shtëpi. Kodi i Procedurës Penale thotë se ke të gjitha ndalimet që ke gjatë arrestit me burg. Nuk e kam shkruar unë as zotëria por e kam votuar dhe unë dhe zotëria. Këtu është ndarja e dy botëve.
Nuk dua të hyj asnjë koment. Nuk kam pasur asnjë kontakt me policinë e shtetit që shtetasi në fjalë të trajtohet një lloj si shtetasit e tjerë.
Është e papranueshme por megjithatë i takon institucioneve të tjera të komentojnë”, tha Balla gjatë një konference për mediat.
Më tej, ai komentoi dhe akuzën ndaj Berishës dhe dhëndërit të tij Malltezi, lidhur me aferën “Partizani”, një dosje të cilën e ka dërguar pikërisht ai në SPAK.
“E kam ndjekur prej shumë vitesh, që kur gatuhej ajo formë privatizimi dhe të gjitha veprat penale që pasuan. Vazhdoj të jem i bindur që rasti i privatizimit të kompleksit Partizani është rast tipik si në librat e kriminalistikës”, tha ai, duke shtuar:
“Një funksionar publik përdor firmën, pozicionin dhe funksionarët e tij brenda ndërtesës për përfitime të paligjshme apo lehtësim procedure. Këtu është korrupsion se janë krijuar miliona pasuri”, ishte arsyetimi i ministrit të Rendit. /tesheshil.com/
