Ish-presidenti Hashim Thaçi dhe ish-kryeparlamentari Kadri Veseli do të vijojnë të qëndrojnë në dhomat e paraburgimit në Hagë, pasi siç ka konkluduar së fundi gjykatësi Charles L. Smith, ata “mund të arratisen nga drejtësia” nëse lihen të mbrohen në liri, si dhe mund ta pengojnë mbarëvarjejen e procedurave, raportojnë mediat kosovare.
“Paneli konkludon se në këtë kohë vazhdon të jetë i pamjaftueshëm informacioni para tij që justifikon konstatimin se z. Thaçi mund të arratiset nga drejtësia”, thuhet në vendim. Megjithatë, theksohet se Paneli ka konstatuar se “ekziston një rrezik i mjaftueshëm që z. Thaçi të pengojë mbarëvajtjen e procedurave të DHS” dhe ai mund të kryejë “krime të mëtejshme kundër atyre që perceptohen si kundërshtarë të UÇK-së, duke përfshirë dëshmitarët që kanë ofruar ose mund të ofrojnë prova”, thuhet ndër tjerash në vendim.
Edhe për Veselin, Gjykata Speciale konstaton se nuk mjafton argumenti i Prokurorisë se ai “mund të arratiset nga drejtësia”.
“Megjithatë, Paneli është i bindur, bazuar në standardin përkatës, se ekziston rrezik se z. Veseli do të pengonte mbarëvajtjen e procedurave të DHS dhe se do të kryente krime të mëtejshme kundër atyre që perceptohen si kundërshtarë të UÇK-së, duke përfshirë dëshmitarët që kanë ofruar ose mund të ofrojnë prova në këtë rast dhe/ose duhet të paraqiten”, thuhet ndër tjerash në vendimin për Veselin.
