Udhëheqësit e vendeve anëtare të Bashkimit Evropian vendosën të hapin negociatat e anëtarësimit me Ukrainën dhe Moldavinë, si miratuan statusin e kandidatit për Gjeorgjinë, njoftoi të enjten presidenti i Këshillit Evropian, Charles Michel, duke e shtyrë dhe më tej sfidimin gjeopolitik të Rusisë me afrimin në kufijtë e saj. Të tre vendet ishin dikur pjesë e Bashkimit Sovjetik, sot njëri i pushtuar e dy të tjerët të këcënuar.
“Këshilli Evropian ka vendosur të hapë negociatat e anëtarësimit me Ukrainën dhe Moldavinë”, njoftoi ai në rrjetin social X.
Për momentin nuk dihen detaje se kur do të mbahet konferenca e parë ndërqeveritare për anëtarësim, as kur do të miratohet korniza negociuese.
“Një sinjal i qartë shprese për qytetarët dhe kontinentin tonë”, thotë Presidenti i Këshillit Evropian.
Presidenti ukrainas Volodymyr Zelensky dhe presidentja moldave Maia Sandu mirëpritën veçmas vendimin e liderëve të BE-së për të hapur negociatat e pranimit me Kievin dhe Kishinaun.
Zelensky shkroi në platformën sociale X se ishte një fitore për Ukrainën.
Kjo është një fitore për Ukrainën. Një fitore për të gjithë Evropën. Një fitore që motivon, frymëzon dhe forcon”, ka shtuar ai.
Sandu shkroi në X se Moldavia do të provojë të jetë e përballueshme me sfidën dhe se ajo është e përkushtuar për punën e vështirë përpara.
“Moldavia sot hap një faqe të re me dritën jeshile të BE-së për negociatat e anëtarësimit. Sot ndjejmë përqafimin e ngrohtë të Europës. Faleminderit për mbështetjen dhe besimin tuaj në rrugën tonë”, ka shkruar Sandu.
Largimi i Viktor Orban nga salla gjatë votimit
Kryeministri hungarez Viktor Orbán njoftoi se Hungaria nuk dëshiron të marrë pjesë në “vendimin e keq” të Këshillit Evropian për hapjen e negociatave për anëtarësimin me Ukrainën.
“Por 26 shtetet anëtare ishin të bindur se ky vendim duhej marrë, kështu që Hungaria vendosi që nëse 26 prej tyre vendosin kështu, atëherë ata duhet të shkojnë në rrugën e tyre”, tha Orban në faqen e tij në Facebook.
Orban ka vendosur të mos përdorë të drejtën e vetos në negociatat e pranimit të Ukrainës gjatë samitit të liderëve të BE-së, u tha gazetarëve kryeministri irlandez Leo Varadkar pas takimit.
“Kryeministri Orbán i paraqiti argumentet e tij shumë fuqishëm. Ai nuk pajtohet me këtë vendim dhe nuk ka ndryshuar mendimin e tij, por në thelb vendosi të mos përdorë të drejtën e vetos”, tha Varadkar.
I pyetur për rolin e Orbanit gjatë votimit, Varadkar tha se kryeministri hungarez nuk ishte në sallë.
Von der Leyen: Një ditë për historinë e BE-së
Presidentja e KE-së Ursula Von der Leyen vlerësoi se vendimi i Këshillit Evropian për hapjen e negociatave të anëtarësimit me Ukrainën dhe Moldavinë dhe dhënien e statusit kandidat Gjeorgjisë ishte një “vendim strategjik” dhe se kjo ditë do të mbetet e gdhendur në historinë e BE-së.
Në rrjetin social X, ajo ka deklaruar se është krenare që liderët e BE-së i përmbushën premtimet e tyre.
Kryetarja e Parlamentit Evropian, Roberta Metsola, tha se ky është një “moment krenar” për Evropën, Ukrainën dhe Moldavinë.
“Për të gjithë ata që luftojnë për vlerat tona. Për të gjithë ata që e shikojnë Evropën si një fener shprese. Ne i mbajtëm premtimet. Ne bëmë histori. Tani së bashku do ta shkruajmë të ardhmen”, ka thënë ajo në rrjetin social X. /tesheshi.com/
