Është shndërruar në një lloj filmi me seri ajo që ndodh çdo të enjte paradite në parlament, me deputetë opozitarë që kacafyten me rojet e Gardës, brenda apo jashtë salle. Kështu ndodhi dhe sot, ku gjithashtu pati flakadanë në sallë. Protagonistët qenë po ato, emra si Flamur Noka apo Gazmend Bardhi, ndryshe pa asnjë lloj stofi politik në politikëbërje. Risi qe që iu shtua dhe deputeti Dash Sula, me një përpjekje për të kërcyer mbi kokat e gardistëve në tentativë për të hyrë në sallë, ngjshëm siç Taulant Balla dikur në opozitë, i cili desh të hynte forcërisht dhe heroikisht në KQZ-në e zgjedhjeve të majit 2011.
Në një reagim, Sula tha se Garda duhet denoncuar.
“Të hartojmë një akt-denoncimi ndaj shefit të Gardës që po pengojnë përmbushjen e detyrës së përfaqësuesve të popullit. Po shkelet ligji dhe të gjithë të drejtat e përfaqësuesve të shqiptarëve. Nuk do të rrijë Shqipëria këtu ku është. U rrëzua diktatura pas 45 vitesh dhe ikin si minj sigurimsat dhe ju ashtu do të përfundoni”.
Nga ana tjetër, kreu i grupit parlamentar socialist, Bledi Çuçi, tha për kolegët e opozitës se ata po “duan të djegin parlamentin për Berishën”.
Kujtojmë se në parlament duhet të votohet imuniteti i Berishës pas një kërkese nga SPAK për dhënie mase arresti.
Kjo situatë në parlament, me shkak pretendimet e grupimit Berisha se mazhoranca po ia mohonon të drejtat për ngritjen e komisioneve hetimore, nisi pas arrestimit të dhëndërit të Berishës, Jamambër Malltezi. /tesheshi.com/
