Kryeministri Albin Kurti është shprehur i gatshëm të nënshkruajë marrëveshjet e Brukselit dhe Ohrit, por edhe draft-statutin e Ssociacionit, të prezantuar nga diplomatët euroatlantikë javën e shkuar.
Në një komunikatë për media pas takimit në Bruksel me krerët e Bashkimit Evropian, ai i ka cilësuar dokumentet e Brukselit dhe Ohrit si sukses të përbashkët me BE-në, duke theksuar se marrëveshja duhet zbatuar në tërësi, pa kushte dhe pa vonesa.
Kurti rikujtoi që ai ishte i gatshëm të nënshkruajë edhe në Bruksel më 27 shkurt 2023 dhe në Ohër më 18 mars 2023, edhe sonte, më 26 tetor 2023, duke theksuar që Samiti i Këshillit Evropian në Bruksel është ngjarja e duhur, në vendin e duhur për nënshkrim të marrëveshjes bazike, përfshirë edhe draftin e ofruar nga BE-ja dhe SHBA-të për zbatimin e nenit 7 në ndërlidhje të nenit 10 të Marrëveshjes Bazike.
Por përkundër këtij qëndrimi, presidenti serb Aleksandar Vuçiç ka refuzuar të nënshkruajë marrëveshje me Kosovën, dhe ka kërkuar që t’i pranohet një letër anësore me të cilën praktikisht i zhbën tri parime të Marrëveshjes Bazë, të Aneksit të Zbatimit si dhe të draftit të propozuar nga pesë emisarët me 21 tetor 2023, siç ka bërë të ditur Kurti.
Në fund të takimit, kryeministri Kurti tha se pranimi nënkupton nënshkrim, vetëm nënshkrimi nënkupton pranimin dhe garanton zbatimin, thuhet në një deklaratë për media të Qeverisë së Kosovës. /tesheshi.com/
