Presidentja e Kosovës, Vjosa Osmani, në një intervistë për CNN tha se mungesa e ekuilibrit dhe drejtësisë në dialog e ka inkurajuar presidentin serb Aleksandar Vuçiç që të sulmojë Kosovën, sepse, sipas saj, presidenti serb ishte i bindur se do të “shpëtonte pa pasoja”.
Ajo tha se Kosova është e vetmja anë konstruktive në dialog, ndërsa Serbia jo.
“Kosova është nën sulm. Kosova është viktimë e një akti agresioni që ndodhi shtatë ditë më parë”, tha Osmani, duke theksuar emrin e Milan Radoiçiçit, i cili u arrestua në Serbi dhe është organizatori kryesor i sulmit në Banjskë të Zveçanit më 24 shtator e bërë thirrje për t’iu dorëzuar Kosovës tek autoritetet.
Por Osmani ka shprehur skepticizëm për dorëzimin e Radoiçiçit sepse “kur është fjala për drejtësinë, Serbia nuk ka një bilanc të mirë”.
“Ka vetëm një anë konstruktive në dialog, ajo është Kosova, e cila ka zbatuar 99 për qind të të gjitha angazhimeve që ka marrë në 12 vjet. Kjo është e kundërta e asaj që bën Vuçiç. Ai nuk i zbaton kurrë. Është një listë e gjatë premtimesh që e bëri Vuçiçi dhe nuk e zbatoi. Ajo që kërkon Kosova është shumë e thjeshtë, ne duam ekuilibër, duam drejtësi nga ky dialog dhe për fat të keq nuk po e marrim. Dhe mungesa e ekuilibrit dhe drejtësisë e inkurajoi Vuçiçin të angazhohet ne akt agresioni, sepse mendon se mund të shpëtojë”, shtoi Osmani.
Presidentja e Kosovës tha më tej se po punojnë ngushtë me aleatët për të penguar “Putinin të hapë një front të ri lufte në Ballkanin Perëndimor”.
“Kosova u përball me kërcënime të sigurisë për shkak të akteve të agresionit të Serbisë më 24 shtator. Është e qartë se ishte një akt agresioni, i urdhëruar nga shteti i Serbisë. Fatmirësisht policia e Kosovës së bashku me partnerët e saj ndaloi zbatimin e këtij plani. Serbia kërkon tension, për të destabilizuar rajonin, për të ndihmuar Putinin të hapë një front të ri lufte në Ballkanin Perëndimor. Ne po punojmë për të parandaluar diçka të tillë Serbia duhet të dënohet, duhet të ketë masa, sepse nëse nuk ka sanksione, do të inkurajohet të vazhdojë aktet e tilla të agresionit.
Në ditët në vijim do të publikojmë dëshmi të reja që tregojnë se Vuçiç është pas dhe urdhëron këtë. Në fillim kishte një fushatë të fortë para se të ndodhte sulmi”, tha Osmani.
Osmani ka paralajmëruar edhe publikimin e dëshmive tjera që dëshmojnë, sipas saj, përfshirjen e Serbisë në sulmin e armatosur në Banjskë, ku mbetën të vrarë rreshteri Afrim Bunjaku dhe tre sulmues. /tesheshi.com/
