Kryeministri Edi Rama njoftoi anulimin e mbledhjes së përbashkët të qeverive Shqipëri-Kosovë, planifikuar për të mërkurën, duke shënuar kështu një krisje të paprecedentë mes tij dhe homologut Kurti, ndodhur kjo në një situatë të tendosur prej krizës në veri.
“E kam informuar kryeministrin Kurti se në kushtet e agravimit me orë të marrëdhënieve të Kosovës me krejt bashkësinë euroatlantike, ky takim nuk mund të mbahet në formatin e parashikuar”, pohoi Rama, duke dhënë dhe detaje se pse çështja mbërriti në këtë pikë.
“Pasi kam folur pasdite me shefin e diplomacisë evropiane, Joseph Borrel, i kam kërkuar Albinit për t’u takuar nesër në Gjakovë në një format më të ngushtë, përkatësisht me ministrat e Jashtëm dhe ata të Mbrojtjes për të diskutuar pikërisht lidhur me këtë situatë, e cila po e çan në mënyrë dramatike Kosovën me bashkësinë euroatlantike në një pikë të paimagjinueshme, ku kjo e fundit ka vënë gishtin, faktikisht, në butonin që do vërë në lëvizje planin e sanksioneve ndaj shtetit që e ka krijuar vetë”, tha Rama, duke shtuar më pas:
“Për fat të keq dhe me shumë keqardhje më duhet të them që nuk kemi pasur dakordësi me kryeministrin Kurti për një ndryshim të formatit, ai ka kërkuar që mbledhja të bëhet normalisht dhe pastaj veç të diskutojmë edhe për këtë, por kjo nuk është e mundur, sepse nuk është një moment për të krijuar një pasqyrë të rreme të asaj që në fakt ndodh në realitetin e Kosovës sot”, u shpreh kreu i qeverisë së Tiranës.
Për të, “mbase nuk është një përgjigje përfundimtare nga ana e kryeministrit”.
“Unë shpresoj shumë që të mund të takohemi për të ballafaquar opinionet në kushtet kur, e përsëris, jemi në prag të vënies në lëvizje të planit, se nuk ma zë as goja të flas për sanksione, por të masave shtrënguese ndaj një shteti që është krijuar nga ata të cilët qartësisht janë në kushtet e sosjes së durimit”, tha Rama, duke shtuar “që është një plan realisht shumë i rëndë për Kosovën”. /tesheshi.com/
