Gruaja e Michael Schumacher jeton “si e burgosur”, duke shmangur dreka dhe festa, për të mbajtur sekret gjendjen e të shoqit, pohon miku i familjes Eddie Jordan.
Schumacher pësoi një aksident në ski në dhjetor 2013 dhe ra në koma. Ai u transferua më vonë në shtëpinë e familjes në Liqenin e Gjenevës në shtator 2014, ku një ekip i stafit mjekësor tani ndihmon Corinna-n të kujdeset për të.
“Kanë kaluar pothuajse dhjetë vjet dhe Corinna nuk mund të shkojë në një festë, drekë apo diçka të tillë. Është si një e burgosur sepse të gjithë duan të flasin me të për Michael, por ajo nuk do që t’i kujtohet kjo çdo herë”, tha Jordan.
Schumacher dikur e përshkroi gruan e tij, 54 vjeçe, si “engjëllin mbrojtës” të tij dhe ajo ka marrë kontrollin e plotë të bllokimit të “çdo zhurmë” që mund të krijohet rreth Michael.
Corinna ka shmangur të flasë publikisht për burrin e saj, por ka hedhur pak dritë mbi problemet e saj në një dokumentar për jetën e tij që u publikua në vitin 2022.
“Michael është këtu. Ndryshe, por ai është këtu dhe kjo na jep forcë,” tha Corinna në atë kohë.
“Ne jemi bashkë. Ne po jetojmë së bashku në shtëpi. Po bëjmë terapi. Po bëjmë gjithçka që mundemi për ta bërë Michael më mirë. Thjesht, duhet të ndiejmë familjen tonë, lidhjen tonë. Dhe pa marrë parasysh çfarë, unë do të bëj gjithçka që mundem. Ne të gjithë do të përpiqemi të vazhdojmë si familje, ashtu siç i pëlqente Michael.
‘Privatja është private’, siç thoshte ai gjithmonë. Për mua është shumë e rëndësishme që ai të vazhdojë ta shijojë jetën e tij private sa më shumë që të jetë e mundur. Michael na ka mbrojtur gjithmonë dhe tani ne po mbrojmë Michael,” tha ajo.
https://youtu.be/qzZpy53I1bc
Një nga të paktët që iu dha mundësia për një vizitë te Schumacher ishte ish-presidenti i FIA-s, Jean Todt, i cili zbuloi në maj 2021 se e vizitonte gjermanin dy herë në muaj. Në një koment të rrallë për Schumacher, Todt tha se gjermani i famshëm është “në duart më të mira” me ekipin mjekësor që punon në shtëpinë e tij.
Todt tha për Bild: “Njerëzit pyesin aq shumë për Michael. Tifozët duhet ta dinë se ai është në duart më të mira dhe i rrethuar nga njerëz që e duan.”
Schumacher është një nga pilotët më të suksesshëm të F1 të të gjitha kohërave, duke fituar shtatë tituj botërorë – 1994, 1995, 2000, 2001, 2002, 2003, 2004. Ai gjithashtu shtoi 71 xhiro më të shpejta dhe 155 podiume në emrin e tij gjatë karrierës së tij ikonike. Djali i tij Mick tani është një pilot rezervë për Mercedes, pasi u shkarkua nga Haas F1 verën e kaluar.
Në shtator të vitit të kaluar, specialisti i neurologjisë me bazë në Zyrih, Profesor Erich Riederer i tha kanalit televiziv francez TMC se ai dyshonte se legjenda e garave do të shërohej plotësisht: “Unë mendoj se ai është në një gjendje vegjetative, që do të thotë se është zgjuar, por nuk përgjigjet. Ai po merr frymë, zemra i rreh, ndoshta mund të ulet dhe të hedhë hapa bebesh me ndihmë, por jo më shumë.” /tesheshi.com/
