Kryeministri i Kosovës, Albin Kurti, pretendon se deklarata e presidentit të Serbisë, Aleksandar Vuçiç, se do të kundërshtojë anëtarësimin e Kosovës në Kombet e Bashkuara, paraqet “shkelje të qartë të një prej pikave të propozimit evropian”.
“Presidenti i Serbisë premtoi mbrëmë se do të kundërshtojë anëtarësimin e Kosovës në OKB. Kjo do të përfaqësonte shkelje të qartë të nenit 4 të propozimit të BE-së”, ka shkruar Kurti në Tëitter.
Ai deklaroi se normalizimi i marrëdhënieve është i mundur “vetëm nëse të dyja palët negociojnë në mirëbesim” dhe beson se Serbia “qartë vendosi të mos e bëjë këtë”.
Vuçiç ishte i ftuar në RTS ku tha se nuk ka nënshkruar asgjë në Bruksel, sepse propozimi i BE-së nënkupton që Serbia nuk është kundër anëtarësimit të Kosovës në OKB.
Ai ka theksuar se në Bruksel nuk është arritur marrëveshje, por se është rënë dakord që bisedimet të vazhdojnë dhe se “kudo ka thënë pa mëdyshje se nuk mund të diskutohet për njohjen e Kosovës, as anëtarësimin në OKB”.
Ministri i Jashtëm evropian, Josep Borrell, pas bisedimeve mes Kurtit dhe Vuçiqit në Bruksel të hënën tha se të dy zyrtarët kanë pranuar si bazë për dialog propozimin evropian, i njohur edhe si plani franko-gjerman.
Ky propozim për normalizimin e marrëdhënieve ndërmjet Serbisë dhe Kosovës është publikuar në faqen e Shërbimit Evropian për Çështje të Jashtme (EEAS).
Propozimi përmban 11 pika dhe ndër të tjera thuhet se palët do të njohin reciprokisht dokumentet dhe simbolet kombëtare, përfshirë pasaportat, diplomat, targat dhe vulat doganore, si dhe se “Serbia nuk do të kundërshtojë anëtarësimin e Kosovës në asnjë organizatë ndërkombëtare.”
Gjithashtu thuhet se të dyja palët konfirmojnë përkushtimin e tyre për të zbatuar të gjitha marrëveshjet e mëparshme në kuadër të dialogut, të cilat mbeten të vlefshme dhe detyruese. /tesheshi.com/
