Shefi i Zyrës së Bashkimit Evropian në Kosovë, Tomas Szunyog dhe zëvendëskryeministri i parë i Kosovës Besnik Bislimi, nënshkruan të premten një marrëveshje për 75 milionë euro ndihmë direkte financiare të BE-së për Kosovën për t’u përballur me krizën energjetike.
“Shuma prej 75 milionë eurosh është kësti i parë i parave që Kosova do të marrë nga pakoja e BE-së për mbështetjen energjetike për Ballkanin Perëndimor në vlerë prej një miliardë eurosh, e cila është krijuar nga BE-ja dhe shtetet anëtare të saj për të ndihmuar rajonin në tejkalimin e krizës energjetike dhe rritjen e madhe e çmimeve të energjisë e shkaktuar nga pushtimi i Rusisë në Ukrainë”, është bërë e ditur nga Zyra e BE-së në Kosovë.
E gjithë paketa do të shpërndahet në dy pjesë, me 500 milionë euro secila, ku fokusi i parë dhe i menjëhershëm do të jetë mbështetja e drejtpërdrejtë për familjet dhe bizneset më të rrezikuara dhe pjesa e dytë do të synojë tranzicionin e rajonit drejt pastërtisë energjitike dhe reduktimin e varësisë nga lëndët djegëse fosile ruse.
Mbështetje e drejtpërdrejtë për njerëzit dhe bizneset
“Pushtimi në shkallë të plotë i Rusisë i paprovokuar dhe i pajustifikuar i Ukrainës ka prekur të gjithë botën duke shkaktuar një krizë energjie dhe ushqimore. Efektet e këtyre krizave ndjehen më së shumti nga ekonomitë më të cenueshme dhe BE-ja ndërhyri për të mbështetur Ukrainën për t’u mbrojtur kundër pushtimit dhe për të ndihmuar partnerët e saj të përballen me krizën”, tha ambasadori Szunyog.
“Mbështetja financiare e ofruar përmes pakos së mbështetjes energjetike të BE-së synon gjithashtu të mbështesë drejtpërdrejt njerëzit dhe bizneset në Kosovë”, shtoi ai.
Bislimi falënderoi BE-në për mbështetjen dhe besimin e dhënë, duke thënë se kjo mbështetje plotëson skemën e Qeverisë për mbështetjen e energjisë.
“Kjo na inkurajon që të punojmë edhe më shumë dhe të vazhdojmë ndërtimin e kapaciteteve institucionale në të gjitha institucionet e departamenteve”, tha Bislimi. /tesheshi.com/
