Në Iran po zhvillohet një konkurs ushtarak me dron, ku ndër vendet pjesëmarrëse janë Rusia, Bjellorusia dhe Armenia.
Televizioni shtetëror iranian shfaqi pamjet e ceremonisë në qytetin e Kashanit, ku dhjetëra përfaqësues nga katër vende u mblodhën për hapjen e turneut.
Ngjarja është pjesë e një eventi lojërash ushtarake vjetore të organizuara nga Rusia që nga viti 2015. Korpusi i Gardës Revolucionare Islamike po pret konkursin në një qytet ku zakonisht kryhet testimi i dronëve.
Ali Balali, këshilltar i Forcave Ajrore të Gardës Revolucionare dhe zëdhënës për turneun, tha se konkursi do të vlerësohet në performancën e natës dhe të ditës dhe gjithashtu do të vlerësojë se si dronët mund të ndihmojnë në drejtimin e zjarrit të artilerisë.
Më shumë se 70 ushtarakë që marrin pjesë në garë do të kalojnë gjithashtu testimin e fitnesit fizik dhe testet e gjuajtjes, tha Balali.
Ai shtoi se qëllimi i lojërave është dërgimi i një “mesazhi paqeje, miqësie dhe bashkëpunimi midis Iranit dhe vendeve të tjera në luftën kundër terrorizmit global”, me një “shkëmbim eksperiencash dhe arritjesh ushtarake” shtesë në fushën e dronëve.
Ministri i mbrojtjes iranian Amir Ashtiani njoftoi se ekspozita ushtarake do të mbahet më 22 gusht dhe në hapje do të marrin pjesë presidenti Ebrahim Raisi dhe zyrtarë të tjerë të lartë.
Pretendimet e SHBA për blerjen e dronëve
Konkursi i dronëve vjen pas pretendimeve të shpeshta të SHBA-së se Rusia planifikon të blejë “qindra” dronë nga Irani për t’i përdorur në Ukrainë, gjë të cilën Teherani e mohon.
CNN raportoi javën e kaluar se SHBA beson se zyrtarët rusë kanë kryer tashmë trajnime në Iran.
Më herët u raportua se SHBA-të besonin se zyrtarët rusë morën pjesë në zbulimin e disa dronëve iranianë në aeroportin e Kashanit.
Irani pretendon se nuk do të bëjë asgjë që do të çonte në përshkallëzimin e luftës në Ukrainë dhe beson se konfliktet duhet të përfundojnë përmes negociatave. Megjithatë, Teherani nuk e dënoi Rusinë.
Teherani dhe Moska po zhvillojnë intensivisht marrëdhëniet mes tyre. Presidenti rus Vladimir Putin ishte në Iran në korrik, duke bërë një vizitë të rrallë jashtë vendit që nga fillimi i pushtimit të Ukrainës në shkurt.
Rusia ndërtoi gjithashtu një satelit për Iranin, i cili u lëshua me sukses në hapësirë javën e kaluar nga një bazë në Kazakistan, mes shqetësimeve perëndimore se Kremlini mund ta përdorë atë për luftën në Ukrainë.
Nga ana tjetër, Ukraina po përdor dronët turq Bayraktar në luftë dhe po kërkon nga SHBA që t’i sigurojë asaj drone edhe më të fuqishëm. /tesheshi.com/
