Thrilleri i pengjeve në një bankë të Bejrutit, ku një libanez mbajti pengje për gati gjashtë orë, pati një fund të lumtur.
Reuters raportoi se personi i armatosur doli nga banka me duart lart. Asnjë nga gjashtë pengjet nuk u plagos, sipas Kryqit të Kuq Libanez.
Personi i armatosur hyri në degën e bankës mesditën e së enjtes, duke kërkuar para nga depozitat e tij të ngrira. “Ai hyri me një armë gjahu dhe materiale të ndezshme dhe kërcënoi punonjësit që t’i jepnin kursimet e tij,” sipas një dëshmitari të raportuar nga Agence France-Presse.
Agjencia libaneze e lajmeve NNA raportoi se burri “kërcënoi t’i vriste gjithë“, ndërsa në një moment ai “i drejtoi armën në kokë menaxherit”.
Sipas NNA, ai hyri në bankë sepse babai i tij ishte shtruar së fundmi në spital për operacion dhe nuk ishte në gjendje të përballonte shpenzimet financiare. “Vëllai im ka 210,000 dollarë në bankë dhe i duhen vetëm 5,000 dollarë për të paguar faturat e spitalit”, u kishte thënë gazetarëve më herët Atef al-Sheikh Hussein, duke shtuar se vëllai i tij synonte të dorëzohej sapo të merrte paratë.
Në një video të postuar në internet, shihen negociatorët që i kërkojnë të armatosurit të lirojë dy klientë të bankës.
BREAKING: Video of hostage situation in #Lebanon at a major bank in downtown Beirut. An armed man is holding bank staff until they release his deposits, he says are $210,000: pic.twitter.com/xG9A9H3Yl8
— Joyce Karam (@Joyce_Karam) August 11, 2022
Për tre vjet tashmë, Libani po kalon një nga krizat më të këqija ekonomike në historinë moderne botërore, sipas Bankës Botërore. Monedha kombëtare ka humbur pothuajse 90% të vlerës së saj dhe rreth 80% e popullsisë është zhytur në varfëri, ndërsa kontrollet e rrepta të kapitalit kanë zemëruar libanezët. /tesheshi.com/
