Gazetari James Risen, në artikullin e tij të botuar në portalin The Intercept, shtron pyetjen: a do të zbresë ish-presidenti amerikan Donald Trump si kreu i mafies Al Capone në vitet 1920?
Pyetja vjen pasi hetuesit federalë bastisën rezidencën e Trump në Florida duke kërkuar dokumente presidenciale që ish-presidenti mund të ketë marrë atje.
Pra, pyetja ka të bëjë me akuzat për keqpërdorimin e sekreteve qeveritare nga Trump, në mënyrë specifike zhvendosjen e dokumenteve të klasifikuara nga Shtëpia e Bardhë në shtëpinë e tij në vend që t’i kthejë ato në Arkivin Kombëtar.
Në artikullin e tij, Risen bëri një krahasim të asaj që ndodhi me Al Capone në çerekun e parë të shekullit të kaluar, i cili ra në duart e agjentit Eliot Ness, në atë kohë drejtor i Byrosë së Ndalimit. Ai përfundoi pas hekurave pas një hetimi të gjatë federal për evazionin e tij fiskal, ndërsa Donald Trump mund të jetë nën hetim nga Prokurori i Përgjithshëm Merrick Garland për rrjedhjet e supozuara të dokumenteve të klasifikuara.
Dokumentet e klasifikuara në shtëpinë e Trump
Sipas gazetarëve, ende nuk është ngritur aktakuzë kundër Trump për veprën penale të tentativës për të nxitur një grusht shteti “të dhunshëm” kundër qeverisë së Shteteve të Bashkuara të Amerikës.
Pra, në vend që të akuzohet se është një “kryengritës i dhunshëm” që dëshiron të “minojë” demokracinë amerikane, Donald Trump mund të futet në burg për një arsye më “banale”: sepse ai ka inatosur Arkivin Kombëtar, i cili është kujdestari i cili ka humbur dokumentet dhe e ka raportuar në Ministrinë e Drejtësisë.
Sipas Risen, pyetja e rëndësishme në zemër të çështjes është: Çfarë kishte planifikuar të bënte Trump me kaq shumë dokumente top-sekret pas largimit nga detyra?
Gazetari amerikan në shkrimin e tij thekson se Trump i ka transferuar qëllimisht këto dokumente në shtëpinë e tij në Florida, duke menduar se do t’i shërbenin disi në të ardhmen, ndoshta në një fushatë tjetër presidenciale, ose në punët e tij private, apo edhe me liderë të huaj. /tesheshi.com/
