Fondi i marrë hua tek BB nga qeveria shqiptare prej 32 milionë dollarësh do t’i kushtohet tërësisht zgjidhjes së marrëdhënies së qytetarit me sportelin që kërkon rryshfet. Kështu e ka analizuar kryeministri Edi Rama reformën në shërbimet publike për të cilën do të përdoren paratë e dhëna nga Banka Botërore.
“Nëse duam që njerëzit të mos korruptohen, duhet të ndërtojmë një sistem që ta bëjë të pamundur korruptimin e tyre. Do të bëjmë të mundur që qytetari të shërbehet më shpejt. Për të arritur që shërbimet publike të jenë të shpejta dhe cilësore, duhet të disponojmë një bazë solide dhe të integruar të dhënash. Ky projekt do të sjellë një shndërrim rrënjësor sepse do i japë shtetit aftësi për t’i shërbyer qytetarit”, tha Rama.
Sipas projektit të qeverisë, pritet eleminimi i burokracive, që shumë shpesh japin shkas që qytetarët e lodhur nga pritja dhe zvarritjet të ofrojnë para ndërsa zyrtarët e korruptuar t’i përdorin si arsyetim për të kërkuar para.
Reforma pritet të shkurtojë kohën e shërbimit për qytetarët në institucionet publike. Sipas ministrit të Financave, Shkëlqim Cani, 32 milionë dollarët do të shlyhen për 20 vjet me me normë interesi nën 2%”. /tesheshi.com/
