NASA ka zbuluar një seri të re imazhesh nga teleskopi i saj i fuqishëm hapësinor, duke përfshirë pamjet e një ylli që po vdes.
Fotoja e parë nga teleskopi James Webb prej 10 miliardë dollarësh u zbulua të hënën në Shtëpinë e Bardhë, duke treguar një mori galaktikash të largëta, që arrijnë më thellë në hapësirë sesa njerëzimi ka parë ndonjëherë.
Katër foto të tjera të publikuara të martën sollën skena edhe më të bukura të hapësirës.
Me një përjashtim, imazhet e fundit treguan pjesë të universit të parë nga teleskopë të tjerë. Por fuqia e Webb-it, distanca nga Toka dhe përdorimi i spektrit të dritës infra të kuqe i treguan ato në një dritë të re.
“Çdo imazh është një zbulim i ri dhe secila prej tyre do t’i japë njerëzimit një pamje që nuk e kemi parë kurrë më parë,” tha të martën administratori i NASA-s Bill Nelson, i entuziazmuar nga imazhet që tregojnë “formimin e yjeve dhe gllabërimin e vrimave të zeza”.
Përdorimi i spektrit të dritës infra të kuqe nga Webb lejon teleskopin që përmes pluhurit kozmik “të shohë dritën e largët nga qoshet e ndryshme të universit”, tha ai.
“Ne kemi ndryshuar vërtet të kuptuarit e universit tonë”, tha drejtori i përgjithshëm i Agjencisë Evropiane të Hapësirës, Josef Aschbacher.
Agjencia Hapësinore Evropiane dhe Kanadeze së bashku me NASA-n punuan për të krijuar një teleskop të fuqishëm. /tesheshi.com/
