Kryeministrja serbe Ana Brnabiç, ka mohuar akuzat se qeveria e re e Serbisë do të vendosë sanksione ndaj Rusisë menjëherë pas formimit të saj.
“Asgjë nuk është premtuar. Pozicioni ynë i vetëm parimor, i miratuar nga Këshilli i Sigurisë Kombëtare, është se ne jemi kundër sanksioneve ndaj Rusisë, si dhe se ne respektojmë integritetin territorial të Ukrainës dhe e konsiderojmë të gabuar shkeljen e këtij integriteti,” tha Brnabiç.
E pyetur se sa e vështirë është të balancosh mes Perëndimit dhe Rusisë, Brnabiç tha se Serbia nuk po balancon, por po ndjek një politikë të qartë të jashtme për të mbrojtur interesat kombëtare.
“Të gjithë ata që tani po spekulojnë nëse qeveria e re do të duhet të vendosë sanksione, e kanë bërë këtë për nëntë vjet dhe kurrë nuk janë mësuar të mbrojnë interesat e tyre. Ne kemi një mënyrë parimore të sjelljes së politikës së jashtme dhe nëse diçka ka shënuar mandatin e Aleksandër Vuçiçit dhe qeverisë së SNS-së, është se ne gjithmonë i kemi mbrojtur interesat tona kombëtare dhe është jashtëzakonisht e rëndësishme që ne të vendosim vetë”, ka theksuar Brnabiç.
Sipas saj, e drejta ndërkombëtare është e njëjtë për të gjithë, por shpesh keqpërdoret nga fuqitë e mëdha.
“Ne nuk po e bëjmë këtë dhe kjo po na mban të sigurt për momentin,” tha Brnabiç, duke shtuar se detyra themelore e autoriteteve në Serbi është ruajtja e paqes dhe stabilitetit në rajon.
Brnabiç tha se çdo ditë po punohet maksimalisht për të hapur kanale të reja komunikimi me partnerët në rajon, por edhe me të gjithë faktorët e bashkësisë ndërkombëtare që kanë nevojë për ndihmë.
Ajo tha gjithashtu se Përfaqësuesi Special i Bashkimit Evropian Miroslav Lajçak do të jetë në Beograd për të diskutuar për vazhdimin e dialogut ndërmjet Beogradit dhe Prishtinës.
“Ne do të diskutojmë se si të vazhdojmë dialogun dhe të kemi një dialog të vërtetë. Beogradi është në tryezë, nuk është larguar kurrë prej aty, por Prishtina është ajo që nuk ka bashkëpunuar,” tha Brnabiç në Radio Televizionin Serb. .
Gjatë takimeve të djeshme për situatën rreth dialogut Beograd-Prishtinë, ka pasur grindje me senatorët amerikanë, por është folur edhe për tensione të tjera rajonale, tha Bërnabiç.
Brnabiç theksoi se shumë janë të shqetësuar nëse do të ruhet stabiliteti dhe shtoi se ajo mendon se do të ruhet stabiliteti në rajon. /tesheshi.com/
