Asnjë person i arsyeshëm, veçanërisht duke pasur parasysh situatën aktuale në Bosnje dhe Hercegovinë, nuk do të sugjeronte një gjë të tillë, thotë i dërguari special i Bashkimit Evropian për çështjet rajonale dhe dialogun ndërmjet Serbisë dhe Kosovës.
Marrëveshja për bashkimin e komunave me shumicë serbe duhet të zbatohet, por askush nuk dëshiron në mënyrë të arsyeshme një Republika Srpska në Kosovë”, tha Miroslav Lajçak, i dërguari special i BE-së për çështjet rajonale dhe dialogun ndërmjet Serbisë dhe Kosovës, përpara se të vizitojë Prishtinën.
“Asnjë person i arsyeshëm, veçanërisht duke pasur parasysh situatën aktuale në Bosnje, nuk do të sugjeronte një gjë të tillë”, tha ai.
I pyetur nëse Asociacioni i Komunave Serbe (ZSO) duhet të ketë kompetenca ekzekutive, Lajçak tha se mendonte se ndoshta do të ishte mirë të ndryshonte qasja.
“Në vend që të themi atë që nuk duam, do të ishte më mirë të pyesim veten se çfarë do të ndodhë, çfarë duam ne, sepse ky është procesi juaj. Askush nuk do t’ju japë një letër dhe nuk do t’ju thotë ‘nënshkruani’. Ju jeni palë e barabartë në proces dhe keni të drejtë absolute të bëni propozimet tuaja në proces. Në vend që të themi se nuk e duam këtë, do të ishte më mirë të thuhej ‘kjo është ajo që ne propozojmë’, ‘kështu duam të bëhet’”, tha Lajçak.
Sipas tij, edhe Serbia ka të drejtë të thotë çfarë të dojë kur është në pyetje Asocacioni i Komunave, sepse është palë e barabartë.
“Ne jemi këtu për të ndihmuar me idetë që bazohen në standardin evropian dhe modelin evropian. Por në asnjë moment – as në të kaluarën dhe as në të ardhmen – nuk do të detyroheni të nënshkruani diçka që mendoni se është e dëmshme për vendin tuaj. Ju jeni në proces. Ju keni të drejtë të sugjeroni dhe refuzoni. Në fund, çfarëdo që të jeni dakord duhet të jetë një kompromis”, tha Lajçak.
Ai nuk e ka pranuar vlerësimin e gazetarëve se dialogu aktualisht është i bllokuar në nivel politik, duke shtuar se qëndrimi i Brukselit zyrtar është që “për takimin e tretë të përgatitet diçka konkrete, rezultate konkrete”.
Ai ka vlerësuar se kryeministri i Kosovës, Albin Kurti dhe presidenti i Serbisë, Aleksandar Vuçiç, janë dy liderë të fortë, me mandat të fortë, që të kenë fuqinë dhe mbështetjen e popullit për të arritur marrëveshje.
“Ata e dinë se kjo është edhe pritshmëri e bashkësisë ndërkombëtare. Por mbi të gjitha, unë mendoj se njerëzit janë të detyruar të normalizojnë marrëdhëniet, sepse situata nuk është e mirë për momentin. Pra, ata mund dhe kanë atë që duhet për të marrë ato vendime. Nuk them se është e lehtë, sepse është jashtëzakonisht e ndjeshme, por ne kemi liderë me mandate të forta dhe mund ta bëjnë”, tha diplomati evropian. /tesheshi.com/
