Valdrin Pjetri, njeriu që i PS-së që gëzoi Shkodrën në pak javë pas një procesi zgjedhor pa rivalë, e që më pas iu zbulua një njollë nga PD deri në dorëheqje, ka folur pas më shumë se dy vitesh, duke sqaruar dhe njëherë atë që ka ndodhur me të.
“Isha 19 vjeç, student. U kapën dy shokë të mi dhe shkova të pyesja për ta. U bë kontroll banesë dhe u gjetën 2 gram hashash. Unë s’kisha dijeni pasi jetonim në një shtëpi më shumë shqiptarë. Ja dokumenti kam shkuar vullnetarisht”, tha ai për TV Klan.
Pjetri tregon se pavarësisht se nuk kishte lidhje me hashashin e gjetur në banesën ku jetonte me shokë të tjerë shqiptarë, pas këshillimit me avokaten, kjo e fundit i sugjeronte të pranonte akuzën që çështja të mbyllej pa vonesë, pasi në të kundërt procesi do të zgjatej. Kështu vendos të firmosë, pa e ditur se vite më pas, ajo firmë do i nxirrte telashe të mëdha..
“Pas presionit, isha vetëm 19 vjeç. Firmosa. Por që s’kisha lidhje e tregon dhe ky dokument në gjykatë”, shtoi Pjetri.
Në vitin 2012, në qeverisjen e Berishës, Pjetri i cili punonte ne Ministrinë e Financave, i kërkon Gjykatës së Firences rehabilitim për veprën e procedura në 2003, çka sipas tij u morr parasysh duke fshirë nga dosja penale e tij në Itali këtë procedim.
“Pas kësaj dëshmia ime e penalitetit si në Gjykata dhe Prokurori dilte e pastër”, pohoi Pjetri, duke u ndjerë viktimë politike.
Pas kësaj. sipas tij nuk kishte detyrim ta deklaronte këtë procedim të 16 viteve më parë në formularin e dekriminalizimit.
Ndaj, dokumentet e publikuara nga PD pretendon se janë nxjerrë në mënyrë abuzive dhe antiligjore nga kuestura e Firences.
Ky rrëfimi i tij vjen në një kohë kur së afërmi do ketë zgjedhje të pjesshme lokale, ku do votohet dhe në Shkodër. Për shkak të tij, ky qytet vijon të qeveriset nga PD. Ndaj Pjetri kërkon një tjetër shans kandidimi.
“Pse jo, mund të kem një tjetër shans nëse kam mbështetjen e socialistëve”.
