Shehi e provon sërish: sjell “Po”-në

Dashamir Shehi, kreu i LZHK, prezantoi platformën e re politike “Po për Shqipërinë”, si një tentativë e re për t’u faktorizuar politikisht, pasi gjithë këto vite, duke patur në karrierë shumë pak vendimmarrje ekzekutive, si ish-ministër në qeverinë e parë të PD-së, ai ka mbetur vetëm një figurë mediatike.

“Një prezantim të vogël: ka ardhur dita të reflektojmë për mundësitë e reja. Opozita shqiptare ka humbur një betejë më 25 prill. Ky është produkt i gjeneratës së re shqiptare. Unë jam këtu si garant politik, i ndershmërisë së kësaj pune. Ne kemi nevojë të vazhdueshme për mjete demokratike. Distanca mes qytetarëve dhe pushtetarëve është rritur vitet e fundit. Askush nuk ka mundësi të kontrollojë votën e vet ku po shkon. Do japim një mundësi edhe për votime brenda platformës. Qoftë për idetë e reja, apo për ligjet që do të diskutohen.

Do e fillojmë me datë 10 janar me ligjin për referendumet sepse e atakon direkt politikën shqiptare. Kjo është e para. E dyta kjo formë referendare është demokracia më direkte dhe më e afërt. Do ta fillojmë me datë 10 janar”.

Më tej ai shpjegoi “Po”-në.

“‘Po’ ja kemi vënë sepse duam të prodhojmë një ide alternative për politikën. Gjithmonë kemi thënë ‘Jo’. Tani është koha për një shans për Shqipërinë që t’i thotë po një ekonomie të ndershme. Duam ta ndërtojmë imazhin e ri me një formë pozitive. Logon e kemi zgjedhur me dy rrathë se është politika me shoqërinë shqiptare. Nuk mund të jetojë vetëm politika si në një ishull. Platforma ‘Po’ është e hapur për politikën dhe pjesën civile për tema që dominojnë sot në Shqipëri”, tha Shehi.

Ai tha se kjo do të shërbejë si armë e opozitës për të çarë atë qe e quajti “rrethim ku kemi rënë vitet e fundit”.

“Armë e re e opozitës shqiptare për të çarë rrethimin ku kemi rënë vitet e fundit. Filozofia është kjo: të rindërtojmë një marrëdhënie të re me publikun. Unë shpresoj se do ta ndjekin me mijëra njerëz për të bashkëpunuar. Ne si themelues jemi 5 veta por janë me mijëra profesorë dhe shkencëtarë që po i afrohen”, tha politikani veteran. /tesheshi.com/