Vlerësohet se 100,000 amerikanë vdiqën nga mbidoza e drogës në një vit, gjë që nuk është regjistruar deri më tani, dhe ekspertët e shëndetësisë e lidhin këtë me pandeminë COVID-19 dhe një furnizim më të rrezikshëm të barnave.
Vdekshmëria nga mbidozat është rritur për dy dekada, veçanërisht në dy vitet e fundit dhe, sipas të dhënave të reja të publikuara të mërkurën, është rritur me gati 30 për qind vitin e fundit.
Presidenti i SHBA Joe Biden e quajti këtë një “pikë kthese tragjike” në deklaratë, pasi zyrtarët e administratës ushtronin presion mbi Kongresin për të lënë mënjanë miliarda dollarë më shumë për të adresuar këtë çështje, raportoi AP.
“Kjo është e papranueshme dhe kërkon një përgjigje të paprecedentë,” tha Dr. Rahul Gupta, drejtor i Qendrës Kombëtare për Kontrollin e Drogës.
Ekspertët besojnë se nxitësit kryesorë të vdekjeve nga mbidoza janë përhapja në rritje e fentanilit vdekjeprurës në furnizimin me droga të paligjshme dhe pandemia COVID-19, e cila ka lënë shumë përdorues të drogës të izoluar socialisht dhe të paaftë për të marrë trajtim apo mbështetje tjetër.
“Numri është shkatërrues. Është një numër vdekjeesh nga mbidoza që nuk është parë në këtë vend,” tha Katherine Keyes, një eksperte e Universitetit të Kolumbias për abuzimin me drogën.
Numri i vdekjeve nga mbidoza e drogës tani e kalon atë nga aksidentet e trafikut, armët, madje edhe nga gripi dhe pneumonia. Numri i përgjithshëm i vdekjeve është afër atij të diabetit, i cili është shkaku i shtatë i vdekjeve në vend.
Bazuar në të dhënat më të fundit të disponueshme, Qendrat për Kontrollin dhe Parandalimin e Sëmundjeve vlerësojnë se 100,300 amerikanë vdiqën nga mbidoza e drogës nga maji 2020 deri në prill 2021.
Të dhënat e reja tregojnë se shumë vdekje janë të lidhura me fentanilin e paligjshëm, një opioid shumë vdekjeprurës që ia kaloi heroinës pesë vjet më parë si lloj droge që përfshihej në shumicën e vdekjeve nga mbidoza. Tregtarët përzienin fentanilin me droga të tjera, që është një nga arsyet e rritjes së vdekshmërisë nga metamfetamina dhe kokaina. /tesheshi.com/
