Qeveria kanadeze lajmëroi një ditë më parë se në vitin 2017 do të priten 300.000 emigrantë, me shumicën e atyre që do të lejohen të hyjnë në vend të përzgjedhur si emigrantë ekonomikë.
Objektivi nuk ndryshon nga plani i 2016-s, por sheh një rritje nga mesatarja e emigrantëve të pranuar në vitet 2011-2015, që është rreth 260.000 të tillë.
“Qeveria e Kanadasë po mban angazhimin për një program të fuqishëm emigracioni, dhe do të mirëpresë 300.000 emigrantë në 2017-n,” thuhet në faqen elektronike të qeverisë.
Ministri kanadez i Emigracionit, John McCallum, u tha gazetarëve se objektivi për këtë numër emigrantësh vë bazat për rritjen e ardhshme të emigracionit.
“Besoj se është e vërtetë që më shumë emigrantë për Kanadanë do të jetë një politikë e mirë për arsye demografike,” u shpreh ai.
Qeverisë kanadeze i është sugjeruar që ta çojë në 450.000 objektivin e përvitshëm për emigracionin, por ky numër është konsideruar i tepruar, më së paku për vitin në vazhdim. /tesheshi.com/
