Dhjetëra mijëra njerëz u mblodhën në Hong Kong për të shënuar 30-vjetorin e ngjarjeve tragjike të Tiananmen-it në Pekin.
Banorët e vendit u mblodhën për të kujtuar njerëzit e vrarë kur forcat kineze të sigurisë ndërhynë për të shuar demonstratat pro-demokratike të mbajtura aty në vitin 1989.
Organizatorët e ngjarjes njoftuan se mbi 180.000 njerëz morën pjesë në vigjiljen vjetore të ndezjes së qirinjve; numër që u kundërshtua nga policia e cila deklaroi se vetëm 37 mijë njerëz morën pjesë në këtë ngjarje.
Në tubim morën pjesë edhe personalitete politike, përfshirë dhe zv. presidentin e vendit Chen Chien-Jen.
“Historia është një pasqyrë që na lejon të marrim hua nga e kaluara si një model për të tashmen. Vetëm ashtu mund të reflektojmë mbi gabimet tona të së kaluarës”, tha ai, duke i kërkuar Kinës që të ndalojë shkeljet e të drejtave të njeriut dhe të zbulojë të vërtetën që qëndron pas goditjes vdekjeprurëse.
“Fatkeqësisht, shumica e të rinjve në Kinë nuk e kanë të qartë se ç’ndodhi në vitin 1989, sepse kjo pjesë e historisë është fshirë plotësisht”, shtoi Chien-Jen.
Gjatë datave 3 dhe 4 qershor, trupat kineze u zhvendosën në drejtim të sheshit Tiananmen të kryeqytetit Pekin – ku mijëra demonstrues të udhëhequr nga studentët po protestonin kundër qeverisë për përmirësimin e standardeve të jetesës dhe liri më të madhe politike. Në vend se të merrnin parasysh kërkesat, ushtria përdori forcën për të shpërndarë protestuesit.
Sipas Kryqit të Kuq Kinez, më shumë se dy mijë protestues u vranë në prag të ndërhyrjes ushtarake që përfshinte tanke dhe trupa.
Imazhi ikonik i “Tank Man” – burrit i cili u përball i vetëm me një numër të madh të tankeve, është fotografia më historike e kësaj ngjarjeje.
Njerëzit e Hong Kong mblidhen çdo vit për të kujtuar ata që u vranë në protesta, në të njëjtën ditë kur ndodhi goditja.
Ndryshe nga si e mendojnë shumë njerëzv, Hong Kongu nuk është vend i pavarur por rajon administrativ i Kinës. Ai është një njësi territoriale e vendit, dhe u bë një rajon i veçantë administrativ i Kinës në vitin 1997 pas nënshkrimit të “Aktit të dorëzimit”.
Rajoni njihet për më tepër liri të jetesës dhe lëvizjes, dhe është njërej qendrave më të mëdha të ekonomisë botërore. /tesheshi.com/
