Sot janë bërë tre vjet nga nënshkrimi i marrëveshjes së parë mes Kosovës dhe Serbisë në Bruksel, në atë kohë nga kryeministri i Republikës së Kosovës, Hashim Thaçi dhe ai i Serbisë, Ivica Daçiç.
Me këtë rast, Thaçi tani nën petkun e të parit të shtetit, ka kujtuar marrëveshjen e parë me Serbinë, ku ka thënë se nënshkrimi i marrëveshjes me palën serbe nuk ishte vendim i lehtë, por më i miri për popullin dhe shtetin e Kosovës.
“Tre vite më parë nisëm një kapitull të ri të komunikimit dhe bashkëpunimit në rajon. Pas një shekulli konflikt, arritëm marrëveshjen e parë paqësore mes Kosovës dhe Serbisë, e cila synon normalizimin e marrëdhënieve dhe në fund pajtimin mes dy popujve dhe dy shteteve, me udhëheqjen e BE-së dhe përkrahjen e SHBA-së”, ka shkruar Thaçi në Facebook.
Presidenti më tej thotë se sytë edhe pse janë kthyer nga e ardhmja, Kosova, asnjëherë s’do të harrojë sakrificën nëpër të cilën ka kaluar.
“Për t’u siguruar që e ardhmja jonë nuk do të kërcënohet nga e kaluara, duhet që normalizimi dhe pajtimi të ndërtohen mbi drejtësi për të gjitha viktimat dhe të zbardhet fati i të pagjeturve”, – shkruan Thaçi.
Ai shton se më e rëndësishmja është se jemi në rrugën e drejtë për të ndërtuar një të ardhme më të mirë për fëmijët tanë, për gjeneratat e ardhshme, çfarë të gjithë ne kemi ëndërruar. Sipas tij, është koha që dialogu të bëhet më dinamik, të rritet efikasiteti në implementim dhe të kalojmë nga procesi i normalizimit të raporteve në pajtim mes shteteve dhe popujve. “Dialogu, normalizimi dhe pajtimi mes shteteve dhe popujve nuk ka alternativë”, shkruan Thaçi. /tesheshi.com/
