Tryeza e thirrur nga presidenti Nishani mes kryeministrit Rama dhe kreut të opozitës Basha ka lënë pezull marrëveshjen. Ilir Meta rishfaqet në skenë.
Negociatat e para sy më sy mes mazhorancës dhe opozitës janë zhvilluar sot në Presidencë, por pa rezultat. Pas tre orësh takim me ndërmjetësimin e presidentit Bujar Nishani të dy liderët e partive kryesore nuk kanë arritur të bien dakord për një marrëveshje politike.
Burime pranë takimit bëjnë të ditur se pikat ku ka ngecur marrëveshja janë kërkesa për dorëheqje të Ramës nga ana e Bashës dhe votimi i vetingut në Kuvend nga opozita para zgjedhjeve, si kërkesë e Ramës.
Ndërkohë vijon të mbetet në fuqi oferta për Bashën për dhënien e disa ministrave teknikë, gati gjysma e qeverisë, si dhe zgjedhja e kreut të KQZ-së me konsensus, plus ndryshime të tjera parazgjedhore që kanë të bëjnë më procesin zgjedhor.
Burimet saktësuan se takimi do të vijojë në darkë po sot. Në një komunikatë për mediat Presidenca tha se “gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj. Presidenti i Republikës vijon të mbajë kontaktet me palët për gjetjen e një zgjidhjeje të mundshme mbi bazë kompromisi”.
Meta rishfaqet në skenë
Kreu i LSI-së, Ilir Meta i cili është zgjedhur president para pak ditësh vijon të mbajë pezull këtë marrëveshje politike mes opozitës dhe mazhorancës dhe pse ai vetë nuk ka qenë pjesë e takimit të sotëm.
Pas takimit në Presidencë kreu i grupit parlamentar të PS-së, Gramoz Ruçi, i cili ishte pjesë e takimit, ka mbajtur frymën tek Meta. Ata të dy u takuan sot në mesditë në hotel “Rogner” në kryeqytet dhe besohet se kanë diskutuar pikërisht për negociatat mes palëve.
Burime nga PD-ja thanë për tesheshi.com se PD shpreson akoma tek roli i Metës si aleat i Ramës. Ata shpresojnë se Meta tani që ka marrë atë që ka dashur, Presidencën, të bëjë më shumë presion ndaj Ramës dhe PS-së.
Burimet thanë se me rikthimin e procesit të regjistrimit në zgjedhje, që sipas gjitha gjasave do të mbahen të paktën një muaj më vonë se data e caktuar më 18 qershor, vendimi që do të marrë LSI për koalicion parazgjedhor është me rëndësi në balancat e reja politike që po krijohen.
Takimi i sotëm dhe qëndrimi për më shumë se 3 orë në një tavolinë tregon hapur dëshirën që kanë të dyja palët për të arritur një marrëveshje, se kush do të të humbasë dhe të fitojë më shumë nga negociatat kjo mbetet për t’u parë. /tesheshi.com/
